Disa lajme nuk janë thjesht kronikë merkatoje, por sinjale. Sinjale të forta, që ndezin kujtime, emocione dhe pritshmëri. Lamtumira e Thiago Silvës me Fluminense, e zyrtarizuar ditën e djeshme, është pikërisht një prej tyre. Një kapitull që mbyllet dhe një tjetër që mund të hapet. Dhe për Milanin, kjo është më shumë se tjesht një zë merkatoje.
- Një lamtumirë që hap një derë të madhe
- Lamtumira nga Fluminense: fundi i një cikli
- Objektivi Botëror dhe thirrja e Ancelottit
- Milan, ku je? Një nevojë që bëhet urgjente
- Max Allegri shtyn: presing i fortë nga trajneri
- Një dashuri e vjetër që nuk është shuar kurrë
- Pellegatti zbulon prapaskenat: “Allegri e do te Milani”
- Një Milan pa alternativa dhe urgjenca e janarit
- Pyetja që pret përgjigje
Një lamtumirë që hap një derë të madhe
Braziliani ka bërë të ditur se do të largohet në fund të vitit 2025, duke i dhënë fund një aventure të shkurtër, por intensive, në vendlindje. Fjalët e tij janë të mbushura me respekt, mirënjohje dhe ndjenjë përkatësie. Por mes rreshtave lexohet qartë diçka tjetër: dëshira për të vazhduar, për të sfiduar veten, për t’u rikthyer atje ku futbolli ka peshë të vërtetë.
More Read
Dhe këtu, hyn në skenë Milani.
Lamtumira nga Fluminense: fundi i një cikli
“Koha jonë së bashku ishte më e shkurtër nga sa mendonim, por mjaftueshëm intensive për të krijuar kujtime që do t’i mbaj me vete gjithë jetën.” Kështu u shpreh Thiago Silva në mesazhin e lamtumirës drejtuar Fluminense-s. Falënderime për klubin, stafin, shokët e skuadrës, familjen dhe mbi të gjitha tifozët, që e bënë të ndihej si në shtëpi që nga dita e parë.
Një lamtumirë elegante, në stilin e një kampioni të vërtetë. Por edhe një deklaratë e qartë: rrugët po ndahen dhe e ardhmja është ende për t’u shkruar.
Objektivi Botëror dhe thirrja e Ancelottit
Në moshën 41-vjeçare, Thiago Silva nuk mendon për tërheqje. Përkundrazi. Objektivi i tij është ambicioz dhe i qartë: të rikthehet në Europë për të rritur shanset e një thirrjeje nga Carlo Ancelotti, trajneri aktual i Brazilit, për Kupën e Botës së ardhshme.
Për ta bërë këtë, i duhet një skenë e madhe. Një kampionat konkurrues. Një ambient që e njeh dhe e vlerëson. Dhe Milanin e Serie A, i përmbushin të gjitha kushtet.
Milan, ku je? Një nevojë që bëhet urgjente
Emri i Thiago Silvës ka qarkulluar prej javësh rreth Milanit. Klubi po kërkon një mbrojtës qendror me përvojë për t’ia vënë në dispozicion Max Allegrit, dhe profili i brazilianit duket i përsosur.
Pavarësisht moshës, ai mbetet një lider natyral, një mbrojtës inteligjent, i aftë në lexim loje dhe në udhëheqjen e repartit. E njeh Milanello-n, e njeh presionin, e njeh Serie A-n. Në një skuadër që po vuan nga mungesa e alternativave të besueshme në prapavijë, një lojtar si Thiago Silva do të ishte një bekim.
Dhe këtu lind pyetja që përsëritet si refren: përse Thiago Silva nuk është ende në Milanello?
Max Allegri shtyn: presing i fortë nga trajneri
Në prapaskenë, Max Allegri po e shtyn fort këtë ide. Trajneri rossoner e njeh shumë mirë Thiago Silvën, të cilin e ka stërvitur gjatë eksperiencës së tij të parë në stolin e Milanit. Besimi është total.
Sipas burimeve pranë klubit, dyshja është në kontakt të vazhdueshëm. Telefonata të shpeshta, shkëmbime mendimesh, respekt i ndërsjellë. Allegri e konsideron një përforcim të sigurt, një zgjidhje me kosto të ulët, por me vlerë të lartë teknike dhe morale.
Në një merkato ku fondet janë të kufizuara, ky detaj bën diferencën.
Një dashuri e vjetër që nuk është shuar kurrë
Thiago Silva nuk e ka fshehur kurrë dashurinë për Milanin. Përkundrazi, vitet e fundit ka bërë disa deklarata publike që tingëllojnë si premtime të lëna pezull.
Ishte viti 2018, kur ishte te PSG, ai shprehej pa ekuivoke: “Si mund t’i them jo Milanit? Është një skuadër që ka qenë dhe do të mbetet gjithmonë në zemrën time. Të rikthehem, ndoshta për të mbyllur karrierën, do të ishte diçka e mrekullueshme. Në futboll, kurrë mos thuaj kurrë.”
Fjalë që sot, më shumë se kurrë, tingëllojnë aktuale.
Pellegatti zbulon prapaskenat: “Allegri e do te Milani”
Është Carlo Pellegatti, zëri historik i botës rossonere, ai ka hedhur dritë mbi gjithë situatën. Sipas tij, Allegri ka kërkuar drejtpërdrejt Thiago Silvën. Jo si ide romantike, por si nevojë konkrete.
“Trajneri dhe mbrojtësi brazilian flasin çdo ditë. Edhe pse më kanë thënë gjithmonë ‘jo’ për rikthimin e tij, e vërteta është se Allegri e ka kërkuar. Ai e ka kuptuar se nuk ka para për merkato në janar,” – shpjegon Pellegatti.
Një deklaratë që peshon. Sepse e bën gjithçka më reale.
Një Milan pa alternativa dhe urgjenca e janarit
Pa Superkupë, pa kupat europiane dhe pas eliminimit nga Kupa e Italisë, Milanit i ka mbetur vetëm Serie A. Një ndihmë e madhe për ëndrrën scudetto, por edhe një pasqyrë e qartë e limiteve të skuadrës.
Rezervat nuk kanë dhënë përgjigjet e pritura. Dhe për këtë arsye, ndërhyrja në merkato bëhet e domosdoshme. Një mbrojtës, një sulmues, një anësor i djathtë. Por në mbrojtje, emri i Thiago Silvës qëndron mbi të gjithë.
Pyetja që pret përgjigje
Gjithçka është gati. Lojtari është i lirë. Trajneri e do. Ambienti e njeh dhe e pret. Nevoja është reale. Dhe kostoja, e përballueshme.
Ndaj e vetmja pyetje që mbetet, gjithnjë e më e fortë, gjithnjë e më e pashmangshme është:
pse Thiago Silva nuk është ende në Milanello?
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
