Skualifikimi i Tonalit, Newcastle: “Milan? Nuk e dimë nëse e dinte”. Përgjigja e kuqezinjve

Sandro Tonali është skualifikuar së fundmi për 10 muaj për shkak të çështjes së basteve dhe më pas do të përballet me 8 muaj të tjerë dënime shtesë. I ka pranuar gabimet e tij dhe avokatët arritën një marrëveshje me Prokurorinë e FIGC, të njëjtën zgjedhje e bëri edhe lojtari i Juventusit, Nicolò Fagioli.

Mesfushori ka vënë bast edhe për Milanin, kur vishte fanellën kuqezi, ndaj dhe pozicioni i tij ka qenë më i rëndë se ai i kolegut të tij. Klubi nuk ishte në dijeni për këtë çështje dhe për momentin nuk ka asnjë provë për të kundërtën. Në rrugën Aldo Rossi janë të qetë.

Çështja Tonali, zhvillimet e fundit: hetim edhe në Angli

Dan Ashworth, drejtor sportiv i Newcastle United, ka folur për temën Tonali gjatë një konference për shtyp: “Është një top player dhe një blerje e madhe, do të na mungojë. Është rikthyer në stërvitje, por para së gjithash është një qenie njerëzore dhe ne kemi një program për ta mbështetur. Sandro ka qenë i jashtëzakonshëm që kur ka ndodhur gjithçka dhe ka qenë plotësisht bashkëpunues. E bëj këtë punë prej 16 vjetësh dhe nuk më ka ndodhur më parë diçka e tillë. Ne jemi të vëmendshëm për të marrë njerëzit e duhur, kalojmë shumë kohë duke vlerësuar si personin ashtu edhe atletin. Është vërtet e ndërlikuar të dish se çfarë mund dhe çfarë nuk mund të dish për njerëzit në këtë botë të qeverisur nga privacy dhe çfarë mund dhe çfarë nuk mund të kontrollosh. Ishte një tronditje e madhe, një surprizë e ardhur nga hiçi”.

Në lidhje me hipotezën që Milani mund të ishte në dijeni të problemit të lojtarit, Ashworth u shpreh kështu: “Është vërtet e vështirë të kuptosh se çfarë dinë apo nuk dinë klubet e tjera. Gjithçka që mund të bëjmë është një hetim i brendshëm. Është vërtet e vështirë për mua të përgjigjem, thjesht nuk e di. Nuk ka pasur asnjë diskutim me Milanin”.

Drejtori sportiv i Newcastle United nuk ka dashur të sulmojë apo të kritikojë klubin kuqezi, por as nuk e mohoi mundësinë e fillimit të një çështjeje ligjore, gjë kjo e zbuluar së fundmi nga Corriere dello Sport. Ndërkohë, Milani nëpërmjet një komunikimi zyrtar me Craig Hope, gazetar i Daily Mail, ka konfirmuar gjithë sa ishte parashikuar javën e kaluar edhe nga redaksia jonë: klubi kuqezi e mori vesh çështjen vetëm përmes mediave dhe nuk pret të ketë kontakte me Newcastle për këtë çështje.

Ndërkohë, Football Association ka hapur një hetim për Tonalin. Siç shpjegohet nga The Athletic, federata angleze kërkon të verifikojë nëse ish rossoneri ka vënë baste edhe për Newcastle United pas transferimit të tij në Premier League. Nëse FA do të konstatonte diçka të tillë, atëherë skualifikimi do të bëhej edhe më i rëndë.