Dy ditët e fundit, merkatoja kuqezi është përfshirë nga një emër i vetëm: Victor Boniface.
Sulmuesi i Bayer Leverkusen ndezi një valë entuziazmi mes tifozëve të Milanit, të cilët e panë nigerianin si “bomberin” ideal për t’i dhënë fund problemeve në repartin ofensiv. Gola, fiziku i fuqishëm dhe karakteri luftarak e shndërruan në profilin e duhur për Allegrin, që ka kërkuar prej fillimit një qendërsulmues me peshë.
Pro-të ishin të shumta:
- Boniface është i ri në moshë dhe me potencial të madh zhvillimi.
- Ka treguar se është një goleador i lindur, i aftë të vendosë ndeshjet i vetëm.
- Profili i tij fizik do të sillte një dimension ndryshe në sulmin e Milanit.
- Personaliteti i tij në fushë shihej si armë e fortë për të udhëhequr projektin e ri.
Dyshimet për Boniface, Milani heziton
Lexo më shumë
Por entuziazmi fillestar u zbeh shpejt, me të dalë në pah edhe çështje të tjera. Boniface ka një histori dëmtimesh të rënda: ka këputur dy herë ligamentin e gjurit dhe në Bundesligë me Bayer 04 Leverkusen sezonin e fundit ka luajtur shumë më pak se sa pritej, shpesh i ndalur nga problemet fizike. Për një klub si Milani, që nuk mund të gabojë në këtë merkato, një investim i madh për një lojtar me një dosje të tillë mjekësore shihet si risk i panevojshëm.
Kështu, pyetja që po qarkullon në Milano është e thjeshtë: a ia vlen të shpenzosh 5 milionë për huazimin e një lojtari që nuk jep garanci fizike? Kjo dilemë po e çon pistën Boniface drejt hapësirash të tjera, përgjigja më e mirë e të cilave pritet pas ditës së nesërme.
Porse ky ngërç ka hapur skenarë të rinj, me Rossonerët që po peshojnë alternativa të tjera për një sulmues me garanci të larta.
Tare në punë: kërkimi për “bomberin” e Allegrit
Igli Tare mbetet në qendër të punës, me objektivin për të sjellë në Milano një emër me peshë që do të bëhet lideri i sulmit. Allegrit i nevojitet një “bomber” që jo vetëm të shënojë, por të japë edhe forcë karakteri për një projekt të ri ambicioz.
Tronditje në mesfushë: Bennacer, Adli dhe Musah jashtë projektit
Ndërkohë, në mesfushë po ndodh një revolucion i vërtetë. Bennacer, Adli dhe Musah nuk konsiderohen më pjesë e planeve të teknikut italian. Për Yunus Musah, largimi është i pashmangshëm: Atalanta ka bërë hapa të rëndësishëm dhe presioni i bergamaskëve për ta marrë lojtarin është i fortë. Distanca mes klubeve është tashmë minimale dhe marrëveshja mund të mbyllet shumë shpejt.
Goditja surprizë: Casado, diamanti i fshehur i Barcelonës
Shitja e Musah shihet si burim financiar për goditjen e madhe në mesfushë. Objektivi quhet Marc Casado, talenti i Barcelonës i vlerësuar 30 milionë euro. Kuqezinjtë kanë hedhur sytë mbi mesfushorin premtues, ndërkohë që katalanasit përballen me vështirësi ekonomike dhe mund të detyrohen ta lëshojnë.
Casado ka kaluar një sezon të komplikuar me fanellën blaugrana dhe transferimi te Milani do të ishte një trampolinë ideale për të rilançuar karrierën e tij. Për Allegrin, ai shihet si lojtari i duhur për të sjellë energji, kreativitet dhe ambicie në mesin e fushës.
Dy javë zjarri: plani i fundit i kuqezinjve
Merkatoja ka hyrë në fazën e saj të fundit dhe Milani ka vetëm dy javë për të goditur fort:
- vendimi përfundimtar për sulmuesin e madh (me Boniface tashmë në dyshim),
- shitja e Musah drejt Atalantës,
- financimi i operacionit Casado që mund të bëhet “ylli i së ardhmes” kuqezi.
Kuqezinjtë janë përpara një momenti vendimtar: çdo lëvizje në këto ditë do të përcaktojë fytyrën e skuadrës së re të Allegrit dhe objektivat që Milani mund të synojë në sezonin që vjen.
