Sfidë e re, ambicie të vjetra

Pas pesë sezonesh te Juventusi, Adrien Rabiot ka zgjedhur një aventurë të re në Serie A, duke nënshkruar me Milanin në orët e fundit të merkatos verore. Një transferim aspak i garantuar për mesfushorin francez, i cili e komenton kështu ndryshimin:

“Pas pesë vitesh te Juventusi, nuk është gjë e vogël të luash për Milanin. Në Torino ishin vite të rëndësishme për karrierën time, vite që i mbaj në zemër. Por jam i lumtur që jam rikthyer në Itali dhe te Milani, një tjetër klub mitik. Edhe këtu ka shumë pasion. Dhe kemi shumë ambicie”.

Një nga elementët që e bëri më të natyrshëm kalimin është prania e Massimiliano Allegrit, tani në stolin Rossoner. Midis të dyve ka pasur gjithmonë një respekt të ndërsjellë të madh:

“Me Allegrin kam pasur gjitmonë një marrëdhënie të mirë. Jemi të ngjashëm dhe e çmoj shumë njerëzisht. Kemi folur dhe shkruar shpesh, madje edhe sezonin e kaluar. Pastaj me Milanin kishte kontakte që vjet, por asgjë nuk ndodhi.

Këtë verë, bënë përpara në fillim të verës dhe u rikthyen sërish pas problemit në Marsejë. Ishte momenti i duhur për të gjithë.

A është Allegri më i vendosur sesa ishte në vitin tuaj të fundit te Juventusi? Ka qenë gjithmonë shumë i vendosur. Është një fitues. Ka gjithmonë uri për fitore dhe shumë pasion.

Kjo më pëlqen, sepse edhe unë i tillë jam. Nuk besoj që kërkon hakmarrje, sepse është një trajner që ka fituar shumë dhe është i respektuar në botën e futbollit.

Mendoj se ka dëshirë të tregojë se ka aftësinë të udhëheqë një skuadër drejt fitores. E nëse Milani e mori, është sepse e dinë se mund të bëjë gjëra të mëdha”.

Determinant, në ardhjen e tij te Milani ishte Mike Maignan, mik i ngushtë i Rabiot:

“Më pati folur shumë mirë. Kishte të drejtë”.

Një tjetër figurë që e ka impresionuar thellë mesfushorin francez është Luka Modric, i cili vazhdon të çudisë me përkushtimin dhe me gjendjen e tij fizike:

“Nuk jam i befasuar nga angazhimi dhe profesionalizmi i tij, përndryshe nuk do të ishte në këto nivele në moshën e tij.

I befasuar jam sepse në dyzet vjeç, është e pabesueshme ajo që bën. Është një që vazhdon të japë gjithçka në ndeshje dhe në stërvitje. Një shembull i vërtetë për të gjithë. Të luash deri në 40 vjeç si ai? Është një frymëzim, por pastaj varet nga faktorë të ndryshëm: fiziku, dëmtimet.

Me siguri Modric ka një pasion të madh. Dhe është pasioni forca motori për gjithçka. Pastaj, ai është i lumtur të vazhdojë të stërvitet fort dhe të luajë”.

Nuk mungon një mendim për Rafael Leaon, ndër talentet më të përfolur në skuadër:

“E di që flitet shumë për të. Është një lojtar me potencial, por 26 vjeç, nuk je më i ri. Në moshën e tij, nuk ke kohë për të humbur. Koha fluturon.

Do të ishte mëkat po të mbetej vetëm një lojtar potencialisht i madh. Shpresoj ta kuptojë se ka mjetet për të konkurruar me më të fortët. Por ndoshta nuk e ka vullnetin apo pasionin e një Modric.

Leao duhet ta pyesë veten se ku dëshiron të shkojë, nëse është i kënaqur kështu, apo objektivi i tij është të bëhet ai që mund të jetë.

Për ne do të ishte një mëkat, sepse do të ishte humbje e madhe nëse nuk do të arrinte potencialin e plotë dhe nuk do të përqendrohej 100% në punën e tij.

Allegri di si të nxjerrë më të mirën nga lojtarët. Shpresoj të ketë një ndikim pozitiv edhe tek ai. Ndoshta për Leaon është mundësia e duhur”.

Lidhur me luftën për Scudetton, Rabiot nuk ka dyshime: Milani mund të luftojë deri në fund, pavarësisht konkurrencës së ashpër:

“Kush po lufton për Scudetton? Si zakonisht, shumë ekipe. Të shohësh Romën kaq lart është paksa surprizë. Napoli mbetet më i forti. Interi është italiania që ka bërë më mirë në Evropë deri më tani, dhe ndryshe nga ne, kanë avantazhin e të luajturit së bashku prej kohësh. Nuk është e pamundur krijimi i dinamikës së duhur.

Te Juve ka cilësi, por më pak se Napoli apo Interi; u mungon ende alkimia për Scudetton. Do të luftojnë për zonën Champions.

E sigurt që ne do të luftojmë deri në fund, dhe shpresoj ta fitojmë përsëri Scudetton, sepse atë Juventusit nuk e celebruam denjësisht për shkak të Covid. Këtë herë, do të doja të festoja me të gjithë tifozët në shesh”.