Sa fiton Ibrahimovic te Milani? Detajet e kontratës së një prej figurave më të spikatura të kuqezinjve

Zlatan Ibrahimovic është rikthyer në Milanello nën pronësinë e re të Cardinales, por jo si lojtar, siç ishim mësuar ta shihnim, por më tepër si drejtues. Jo më gola spektakolar apo asiste vendimtare, por një rol që e sheh pas një tavoline, përpara tekekamerave, në tribuna dhe me një përgjegjësi të re: atë të konsulentit të lartë për sektorë të ndryshëm të klubit. Nga lideri i padiskutueshëm në fushë, detyra e tij tani është të udhëheqë Milanin në një mënyrë tjetër dhe të gjithë po pyesin se çfarë lloj figure është në të vërtetë Ibra si drejtues. Cili është roli i tij? Sigurisht, kjo është një detyrë e pazakontë, e cila po zgjon shumë kuriozitet tek tifozët dhe te specialistët e fushës.

Rikthimi i Ibrahimovic te Milani është dëshiruar shumë nga pronarësia RedBird, që ka parë tek ai jo vetëm një simbol të historisë së fundit të klubit, por edhe një pasuri të rëndësishme për të ardhmen. Pasi vari këpucët në gozhdë, Zlatan ka pranuar ofertën e Cardinales për t’u bërë pjesë e drejtimit të klubit. Krahas tij, punojnë figura të rëndësishme si Furlani dhe Moncada. Roli i tij zyrtar, sipas klubit, është ai i Senior Advisor – Këshilltarit të Lartë për sektorët administrativë, sportivë dhe komercialë, një rol që nuk gjendet lehtë në futbollin europian, por që ekziston edhe në disiplina të tjera sportive, si bejsbolli apo futbolli amerikan. duke marrë frymëzim nga modeli i famshëm “Moneyball”.

Përshkrimi i rolit te Milan dhe paga e tij

Përshkrimi i rolit të tij u konfirmua në një deklaratë të RedBird, që sqaroi se si Ibrahimovic, do të luajë një rol aktiv në operacionet sportive dhe komerciale të Milanit. Më konkretisht, ai do të ndihmojë në forcimin e kulturës fituese të klubit, duke punuar në rritjen e lojtarëve, në stërvitjet performuese, në promovimin e markës në nivel global dhe zhvillimin e projekteve strategjike, si ndërtimi i stadiumit të ri. Me pak fjalë, një rol që varion nga menaxhimi i dhomës së zhveshjes, e deri në merkato, me ndikim edhe në aspektet ekonomike dhe infrastrukturore të klubit.

Paga e Ibrës te Milani si drejtues

Sa i përket aspektit financiar, nuk ka asnjë informacion zyrtar për pagën e Ibrahimovic në postin e tij të ri drejtues. Sidoqoftë, dihet se paga e tij e fundit si futbollist, në sezonin 2022/2023, ka qenë rreth 1.5 milionë euro. Pas tërheqjes nga futbolli i luajtur, Ibra hyri të bëjë pjesë në RedBird Group, duke marrë rolin e partnerit operativ për investime në sektorët e Sportit, Medias dhe Argëtimit. Në këtë pozicion të ri, supozohet se kompensimi i tij mund të jetë i lidhur me ndikimin dhe rezultatet e arritura në punën e tij si konsulent dhe drejtues, edhe pse detaje të sakta nuk janë bërë të ditura.

Një figurë e shumëfishtë dhe me shumë peshë

Figura e Ibrahimovic, pra, duket se ka ndikim në zona të ndryshme të Milanit. Përveç punës për rritjen e lojtarëve, kontributi i tij ka të bëjë edhe me stërvitjen, me synimin për përmirësim të vazhdueshëm, për të garantuar që klubi të mbetet konkurrues si në nivel kombëtar ashtu edhe ndërkombëtar. Roli i tij nuk kufizohet në kufijtë e fushës, por shtrihet edhe në vendime të rëndësishme ekonomike dhe zgjedhje strategjike, si ndërtimi i një stadiumi të ri. Këto përgjegjësi sigurisht nuk janë të parëndësishme dhe demonstrojnë dëshirën e RedBird për të bërë që Ibra të mos jetë thjesht një ish-futbollist, por edhe një shtyllë e vërtetë në ndërtimin e të ardhmes kuqezi. Rikthimi i tij në Milanello nuk është vetëm çështje imazhi, por është pjesë e një vizioni më të gjerë strategjik, që synon të forcojë strukturën e klubit edhe jashtë fushe. Gjurma e Ibrahimovic, pra, nuk është vetëm ajo e një simboli, por e një figure me një përgjegjësi konkrete në evolucionin e Milanit, si në aspektin sportiv ashtu edhe në atë komercial.

Ibra komunikues: zëri i tij në vendimet e rëndësishme

Përveç rolit si konsulent dhe strategjik, Ibrahimovic ka nisur të mbulojë edhe një rol të rëndësishëm si komunikues për klubin. Së fundmi, ka folur personalisht me trajnerin Paulo Fonseca për shkarkimin e tij, një ngjarje kjo që ka tërhequr shumë vëmendje. Ibrahimovic e shpjegoi vendimin, duke pranuar se trajneri kishte dështuar të arrinte qëndrueshmërinë e nevojshme në rezultate, një aspekt themelor për një klub si Milani. “Kur je Milan, rezultatet janë thelbësore”, deklaroi ai, duke nënvizuar se përgjegjësia për shkarkimin nuk është vetëm e trajnerit, por e bashkëndarë me të gjithë klubin. Ky qëndrim ka treguar se si Ibra nuk kufizohet vetëm në një rol konsulenti, por mund të jetë edhe një pikë referimi për vendimet më të rëndësishme të klubit, si përzgjedhja e trajnerit dhe drejtimi i skuadrës.