Rreziku nga Zirkzee dhe kuptimi i ardhjes së Moratës

Nëse Milani ka bërë një gabim në këtë pjesë të parë të merkatos verore, ishte qëndrimi shumë të gjatë pas tekave dhe kapriçove të Zirkzee. Qendërsulmuesi holandez mund të jetë një mundësi interesante me një çmim në përpjesëtim me vlerën e tij reale (25-30 milionë euro). Me 55 milionë në total, rrezikonte të ishte investim me një marzh rreziku shumë të madh. Zgjedhja për të shkuar mbi Alvaro Moratën ishte ndoshta e vonuar, por fatmirësisht pati një rezultat pozitiv.

Jo aq dhe jo vetëm për shkak të kostos së përballueshme të kartonit të lojtarit (13 milionë euro), por mbi të gjitha sepse, në nivel teknik, do të ishte e vështirë të gjeje diçka më të mirë në dritaren aktuale të merkatos. Morata është një sulmues me vlerë, është një sulmues që shkon në shifra dopjo realizuese prej 10 sezonesh rresht (d.m.th. që kur ishte vetëm 21 vjeç). Ka cilësi të rëndësishme në hapësira të ngushta, por edhe në sulmin ndaj portës është i mirë. Shënon në të gjitha mënyrat, me kokë, nga e djathta, nga e majta, në akrobaci dhe ka një nuhatje asisti, e cila me kalimin e viteve është përmirësuar shumë. Nëse do të kishte ardhur Zirkzee, Milani nuk do të kishte firmosur me një lojtar të gatshëm, por me një qendërsulmues për t’u ndërtuar, duke punuar shumë mbi talentin dhe mbi potencialin e tij teknik. Objektivisht, nuk mund të shpenzosh mbi 50 milionë për të pasur një lojtar mbi të cilin duhet punuar.

Këto shifra duhen rezervuar për lojtarët të gatshëm. Me Moratën, Milani ka sjellë në shtëpi një profesor që luan në rolin e qendërsulmuesit. Nëse spanjolli nuk do të kishte ardhur tek Milan, do të kishte patur një problem të vërtetë sepse alternativat (Lukaku) ishin dhe janë krejtësisht në kundërshtim me mënyrën e lojës së Milanit. Prandaj është mirë që çështja e sulmuesit të parë titullar të sezonit 2024-2025 është zgjidhur. Tani mund të përqëndrohemi mbi dy rolet e tjera të pambuluara (mbrojtësi qendror dhe mesfushori), role në të cilat Milani është i vetëdijshëm se duhet të bëjë dy investime të synuara mbi lojtarë me karakteristika specifike.