Në Milanello fryn një erë e re: eksperienca si armë strategjike. Nën drejtimin e Massimiliano Allegrit, klubi kuqezi ka dëshmuar se mosha nuk është pengesë kur bëhet fjalë për cilësi, profesionalizëm dhe lidership.
Modric ishte nisja… tani Milani synon edhe komandantin e mbrojtjes
Transferimi i Luka Modric rezultoi një goditje e artë: 40-vjeçari kroat, që shumë e mendonin të konsumuar, ka treguar fizik të hekurt, inteligjencë taktike dhe ndikim të menjëhershëm në mesfushë. Ai nuk erdhi për nostalgji, por për të bërë diferencën — dhe e ka bërë.
Lexo më shumë
Shembulli i Modric hap dyert për lëvizje të tjera të mëdha. Në horizont është përfolur edhe emri i Robert Lewandowskit, bomberit polak që mbyll kontratën me Barcelonën në qershor 2026.
Pas një ylli të lirë nga Real Madrid, pse jo një tjetër nga La Liga? Pse jo një kthim madhështor?
Që prej disa javësh, në Milano qarkullon një ide që deri dje dukej thjesht një fantazi romantike: rikthimi i Thiago Silvas. Një emër që bën të vibrojë zemrat e tifozëve dhe që ringjall kujtime të një epoke të lavdishme. Sot, ajo fantazi po merr formë reale.
Milani synon Thiago Silva: kontrata është gati
Sipas redaksisë sportive të të përditshmes më të madhe gjeneraliste italiane, La Reppubblica, Milani po reflekton seriozisht mbi mundësinë për ta rikthyer Thiago Silvan në Itali.
Jo thjesht një operacion emocioni, por një zgjedhje sportive që lidhet drejtpërdrejt me nevojat e ekipit. Allegri kërkon një qendërmbrojtës me peshë, që di të menaxhojë momente të nxehta, të udhëheqë të rinjtë dhe të transferojë mentalitet fitues në dhomën e zhveshjes.
Edhe pse 41 vjeç, statistikat flasin vetë: në vitin 2025, Silva ka zhvilluar 43 ndeshje, 42 prej tyre si titullar. Fiziku i tij mbetet në nivel të lartë, dhe dëshira për futboll nuk është zbehur. Kontrata e tij me Fluminense mund ta lirojë pas dhjetorit 2025, duke e bërë një objektiv konkret për merkaton verore.
Zëri i tifozëve: emocion dhe pragmatizëm
Tifozët e Milanit ndahen në dy rryma: ata që shohin rikthimin e Silvas si një udhëtim magjepsës drejt së shkuarës dhe ata që shohin vlerën sportive të një “kapiteni” të vërtetë.
E vërteta? Dyja palët kanë të drejtë: Thiago Silva është nostalgji e bukur, por njëkohësisht edhe armë strategjike për një repart që kërkon stabilitet dhe autoritet.
Sipas La Repubblica, brenda klubit po zhvillohet një debat i gjallë, por grupi që mbështet transferimin po rritet çdo ditë. Nga një ide e largët romantike, operacioni po shndërrohet në një plan të prekshëm.
Rikthimi që ndez ëndrrën kuqezi
Milani po ndërton një projekt të bazuar jo vetëm te e ardhmja, por edhe te përvoja. Modric ishte sinjali i parë.
Lewandowski mund të jetë goditja e radhës. Por rikthimi i Thiago Silvas? Do të ishte një akt simbolik dhe sportiv që vulos ambicien e një klubi që nuk ka frikë të ëndërrojë madhështor.
San Siro ka pritur shumë kampionë… a do të rikthehet komandanti për t’i udhëhequr sërish? Tani gjithçka varet nga vendimi i fundit — dhe zemra e Milanit rreh fort për “supermen-in” e tij.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
