RedBird, Toulouse në shitje? Cardinale po e mendon

Sezoni i Milanit po hyn në zemër të kompeticionit. Edhe pse skuadra e Piolit është totalisht e përqëndruar në fushë, kompania nën zotërimin e Gerry Cardinale është shumë aktive edhe jashtë fushës. Përveç çështjes së stadiumit që është në krye të dëshirave dhe objektivave të pronarëve amerikanë, RedBird po shqyrton edhe mundësinë e heqjes dorë nga mazhoranca e Toulouse, klubit francez që merr pjesë në Ligue 1.

Fondi amerikan, që në gusht 2022 i bleu kuqezinjtë për 1.2 miliardë nga Elliot, është një kompani investimesh që menaxhon edhe klube të tjera pjesërisht apo tërësisht. Krahas indianëve Rajasthan Royals dhe në mënyrë indirekte Liverpoolin, Cardinale zotëron edhe 85% të klubit francez me të cilin ka arritur objektiva të rëndësishëm përfshirë pjesëmarrjen në Europa League.

Arsyet që po e shtyjnë të reflektojë Cardinalen qëndrojnë pikërisht te Milani. Marka rosonere ka një prestigj padiskutim më të rëndësishëm se ajo franceze, veçanërisht përsa i përket trofeve dhe popullaritetit në botën sportive. Numri një i RedBird nuk është shprehur ende për këtë temë, por menaxhimi i njërit klub do të përjashtonte tjetrin. Kufijtë e vendosur nga FIFA ndalojnë pjesëmarrjen e dy klubeve nën të njëjtën pronësi në të njëjtin kompeticion, edhe pse për momentin ky problem nuk ekziston, duke qenë se dy skuadrat luajnë në dy turne të ndryshëm evropianë.

Pavarësisht ndryshimeve të pozicioneve në Bordin Drejtues të dy klubeve dhe dorëheqjes së vetë Cardinales nga drejtimi i drejtpërdrejtë i Toulouse, rreziku për të ngecur në këtë problem mbetet. Ndaj, shitja e klubit francez është ende duke u vlerësuar nga RedBird, në pritje të lajmeve të tjera të rëndësishme.