Adrien Rabiot nuk është thjesht një mesfushor me përvojë ndërkombëtare. Në intervistën e gjatë për Sky, francezi shfaqet si një lider i vërtetë, një lojtar që lexon momentin e Milanit jo vetëm me këmbë, por edhe me mendje.
Fjalët e tij janë të qarta, të drejtpërdrejta dhe mbi të gjitha plot ambicie. Ai flet për një Milan që po rritet, për një skuadër që ende ka lënë pikë rrugës, por që ka themele solide për të synuar lart. Nga ndikimi i Massimiliano Allegrit, te transformimi i Rafael Leao-s, nga pesha e Maignan në portë, deri te ëndrra e madhe e Scudettos, Rabiot ofron një panoramë të plotë të një Milani që nuk dëshiron të kënaqet me “mjaftueshëm”, por kërkon maksimumin.
Një Milan që rritet, por që duhet të bëhet më cinik
More Read
Rabiot e nis analizën nga sezoni aktual i kuqezinjve, duke nënvizuar se ambientimi i tij ka qenë i menjëhershëm dhe pozitiv.
“Që në fillim u ndjeva mirë, kemi bërë një rrugëtim të bukur në kampionat”, shprehet ai, por pa fshehur se Milani mund të kishte bërë më shumë. Sipas tij, disa pikë janë humbur pa nevojë, veçanërisht ndaj skuadrave më të vogla.
Problemi, sipas francezit, është kryesisht mendor: qasja ndaj ndeshjeve. “Ndonjëherë relaksohemi, mendojmë se kemi bërë diçka të madhe dhe në fund e paguajmë”, thotë Rabiot.
Ai thekson rëndësinë e ruajtjes së të njëjtit nivel kundër çdo kundërshtari dhe rolin kyç që duhet të kenë lojtarët me përvojë për të udhëhequr më të rinjtë. Milani është një klub që kërkon shumë dhe kjo, sipas tij, është një provë që të bën ose një lojtar të madh, ose të lë pas.
“Leao i ri”, Loftus-Cheek surpriza dhe “dora” e Allegrit
Një nga pikat më interesante të intervistës është vlerësimi për shokët e skuadrës. Rabiot veçon Loftus-Cheek si një lojtar me potencial të jashtëzakonshëm, ndoshta ende të pashfrytëzuar plotësisht. “Është vërtet shumë i fortë, e kam parë edhe kundër, edhe në stërvitje”, thotë ai.
Por fjalët më domethënëse janë për Rafael Leao-n. “Ai ka ndryshuar”, deklaron Rabiot pa hezitim. Jo vetëm në aspektin teknik, por sidomos në qëndrimin në fushë.
Sipas tij, gjithçka nis nga mentaliteti: nëse Leao e ruan këtë qasje të re, rritja e tij do të jetë e pandalshme.
Në qendër të këtij transformimi qëndron Massimiliano Allegri. Rabiot është i bindur se ndryshimi kryesor i Milanit nga sezoni i kaluar nuk është një lojtar i vetëm, por trajneri dhe stafi i tij.
Allegri, sipas francezit, ndikon fort në kokën e lojtarëve, sepse e kupton se futbolli nuk është vetëm çështje këmbësh. Marrëdhënia mes tyre është e veçantë, e ndërtuar mbi besim dhe komunikim të heshtur, një faktor që po e bën Milanin më të fortë nga brenda.
Maignan, San Siro dhe Scudetto që nuk është tabu
Kur vjen puna te Mike Maignan, Rabiot nuk ka asnjë dyshim: Milani ka nevojë absolute për të. Portieri francez përshkruhet si një nga më të fortët në botë, i dashur nga të gjithë shokët e skuadrës dhe i pazëvendësueshëm për balancat e ekipit.
“Të gjithë duam që të qëndrojë”, thekson Rabiot, duke e cilësuar si një lider të vërtetë dhe vendimtar në ndeshje.
Ambienti i San Siros, për Rabiot, është një shtysë shtesë. Tifozëria kuqezi e bën çdo ndeshje të veçantë dhe i kujton lojtarëve peshën e fanellës që mbajnë veshur.
Dhe më në fund, Scudetto. Pa frikë, pa komplekse. Rabiot pranon se objektivi minimal është Top 4, por personalisht synon më shumë.
“Nëse mund të marrësh dhjetë, pse të kënaqesh me gjashtë?”, pyet ai. Kampionati është i gjatë, Milani nuk është as në gjysmë të rrugës dhe ëndrra e vendit të parë nuk është e pamundur. Përkundrazi, sipas tij, skuadra duhet ta ushqejë këtë mentalitet fitues, ta bëjë të prekshme bukurinë e fitores edhe për lojtarët më pak me përvojë.
Madje, nëse Scudetto do të vijë, Rabiot nuk e përjashton as një tatuazh – një shenjë e përhershme për një fitore që do të kishte peshë historike. Sepse, siç e thotë vetë ai, te Milani të fitosh është gjithmonë diçka edhe më e madhe.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
