Tre vite më parë ishte në qendër të botës së futbollit, në skenën më të madhe të mundshme. Finalja e Kupës së Botës në Katar, përballë Argjentinës së Lionel Messit, e pa Axel Disasi-n të vishte fanellën e Francës, duke kontribuar – qoftë edhe për disa minuta – në rrugëtimin e “Les Bleus” drejt titullit të nënkampionit të botës. Sot, realiteti është krejt tjetër.
Nga kulmi absolut i karrierës te kërkimi i një skuadre ku të rilindë, rruga e Disasi ka marrë kthesa të papritura. Te Chelsea i Enzo Maresca-s ka përfunduar në fund tw hierarkisë, i konsideruar jo funksional për projektin teknik. Por pikërisht këtu hapet një dritare e re: Milani. Klubi kuqezi e monitoron prej muajsh, i vetëdijshëm se në një ambient me shumë francezë dhe ish-shokë kombëtare, Disasi mund të gjejë terrenin ideal për t’u rikthyer në orbitën e madhe, me një sy nga Botërori i ardhshëm.
Disasi dhe Chelsea: nga investimi 45 milionësh, në plan të dytë
More Read
Axel Disasi është një mbrojtës me fizik imponues, i ndërtuar për duele dhe për futbollin modern. Chelsea e bleu në vitin 2023 për rreth 45 milionë euro nga Monaco, pas tri sezonesh të plota në Principatë ku ishte afirmuar si një nga qendërmbrojtësit më të mirë të brezit të tij.
Megjithatë, ardhja e Enzo Maresca-s ndryshoi gjithçka. Perspektivat e Disasi u zvogëluan ndjeshëm, pavarësisht faktit se në sezonin e parë ai kishte qenë titullar i rregullt. Edhe pse në Conference League u aktivizua gjithmonë nga minuta e parë në gjashtë ndeshjet e fituara, duke kontribuar me një gol dhe dy asist, kjo nuk mjaftoi për të bindur trajnerin italian.
Kështu, sezoni i kaluar e pa francezin të përfundonte në huazim te Aston Villa, pas të cilit janari e gjeti me një vazhdimësi relative prej disa muajsh, madje duke luajtur edhe në Champions League deri në çerekfinalen e humbur ndaj PSG-së. Një sfidë simbolike, në Paris, në qytetin e tij, aty ku gjithçka kishte nisur.
Nga periferia e Parisit te finalja e Botërorit
Historia e Disasi është ajo e një ngjitjeje graduale, e ndërtuar me durim. I lindur dhe rritur në Villiers-le-Bel, në veri të Parisit, ai i dha goditjet e para topit më 2004, vetëm gjashtë vjeç. Në moshën 16-vjeçare u mor nga Paris FC, ku debutoi në Ligue 2 në moshën 17-vjeçare, duke përjetuar edhe një rënie nga kategoria.
Kalimi te Reims, fillimisht te të rinjtë, ishte një hap prapa i domosdoshëm për të bërë dy hapa përpara. Pas një sezoni gavete, firmosi si profesionist, fitoi promovimin në Ligue 1 dhe u bë protagonist i një rritjeje të shpejtë që e çoi në radarët e Monaco.
Në Principatë u konsolidua, u promovua edhe nënkapiten dhe, falë këtij zhvillimi, u ngjit në trenin e Botërorit 2022 në Katar, duke zëvendësuar në momentet e fundit të dëmtuarin Kimpembe. Një shpërblim i madh për një rrugëtim të ndërtuar me sakrifica.
Merkato dhe Milani: “jo” Monaco-s dhe shansi për rilindje
Pas huazimit te Aston Villa, Chelsea vendosi ta nxjerrë Disasi-n në merkato. Monaco e kishte kërkuar që në verë, por kufizimet e huazimeve e bënë operacionin të pamundur. Nën kontratë deri në vitin 2027, mbrojtësi u gjet për një periudhë jashtë projektit, duke u stërvitur me të rinjtë dhe duke u rikthyer vetëm kohët e fundit në disa seanca me ekipin e parë.
Tani objektivi është i qartë: gjetja e një skuadre ku të jetë protagonist. Milani, që prej kohësh e ndjek profilin e tij, mund të jetë zgjedhja ideale. Një klub historik, një ambient i fortë, një trajner që kërkon fizikalitet dhe personalitet në mbrojtje.
Nëse të gjithë do të thonë “po”, Axel Disasi mund të nisë kapitullin e ri të karrierës së tij me ngjyrat kuqezi, me objektiv të rikthehet në nivelet që i takojnë dhe për të rihapur dyert e Kombëtares franceze. Nga finalja e Botërorit te sfida e rilindjes: historia e Disasi mund të rifillojë pikërisht nga Milano kuqezi.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
