Fitoret e mëdha shpesh hapin edhe horizonte të reja. Dhe suksesi në derbin kundër Interit duket se ka dhënë energji jo vetëm në fushë, por edhe në zyrat e Milanello-s. Vetëm dy ditë pas triumfit në Derby della Madonnina, Massimiliano Allegri dhe administratori delegat Giorgio Furlani janë ulur në një takim kyç për të diskutuar të ardhmen e klubit kuqezi.
Tema kryesore është e qartë: Champions League dhe merkatoja e verës. Kualifikimi në kompeticionin më të rëndësishëm evropian për klube mund të sjellë rreth 60 milionë euro në arkat e Milanit. Dhe filozofia e klubit mbetet e pandryshuar: ajo që prodhon skuadra në fushë, investohet sërish për ta bërë atë më të fortë.
Në këtë kuadër, mes shpërblimeve të UEFA-s, rikthimeve nga huazimet dhe disa shitjeve të mundshme, buxheti i merkatos mund të kalojë shifrën e 100 milionë eurove. Një kapital i rëndësishëm për të ndërtuar një Milan më konkurrues në Itali dhe në Evropë.
Një bomber për sulmin: në krye të listës Kean
Në projektin teknik të Allegri-t ekziston një ide e qartë: përforcime të forta, të gatshme menjëherë për të qenë titullarë. Prioriteti absolut është sulmi.
Emri që pëlqehet më shumë është ai i Moise Kean. Sulmuesi i Fiorentina-s vjen pas një sezoni shumë pozitiv, ku realizoi 19 gola dhe konfirmoi cilësitë e tij si një “nëntë” modern. Fizik, i shpejtë në kundërsulm dhe i aftë të luajë me shpinë nga porta, Kean konsiderohet perfekt për stilin e Allegri-t.
Pengesa kryesore mbetet klauzola e largimit prej 62 milionë eurosh, e cila aktivizohet në muajin korrik. Një shifër e rëndësishme, por jo e pamundur nëse Milani vendos ta bëjë atë investimin kryesor të merkatos.
Mbrojtje dhe mesfushë: Kim dhe Goretzka në radar
Merkatoja kuqezi nuk ndalet te sulmi. Klubi po studion edhe përforcime të rëndësishme në mbrojtje dhe në mesfushë.
Në qendër të mbrojtjes një nga emrat më të diskutuar është Kim Min-jae i Bayern Munich. Koreani, një ish-yll i Serie A, vlerësohet rreth 30 milionë euro dhe përfaqëson një profil me eksperiencë ndërkombëtare dhe fizikalitet të madh. Alternativa mbetet Mario Gila i Lazio-s, një mbrojtës që është rritur shumë në kampionatin italian.
Në mesfushë mund të hapet një mundësi e artë: Leon Goretzka. Gjermani mund të largohet nga Bayern Munich si lojtar i lirë, një rast që Milani e ndjek me shumë vëmendje. Një mesfushor me forcë fizike, eksperiencë dhe aftësi për të shënuar – cilësi që mund të rrisin nivelin e mesfushës kuqezi.
Ndërkohë, klubi pret edhe përgjigjen e Luka Modric për një zgjatje të kontratës edhe për një sezon tjetër. Veteranit kroat i njihet ndikimi në dhomat e zhveshjes dhe cilësia në ndërtimin e lojës.
Plani është gati: një Milan i ri, me investime të mëdha dhe ambicie të qarta. Dhe nëse Champions League bëhet realitet, vera kuqezi premton të jetë një nga më të nxehtat e viteve të fundit.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
