Milan, tani është rradha e Champions. Dështimi i Zirkzee dhe prapaskena Morata. Rekordi në historinë e klubit

Dy fitoret e bukura kundër Interit dhe Leçes kanë rikthyer besimin dhe entuziazmin te Milani pas një periudhe fillestare shumë të komplikuar. Dhe tani vjen testi europian ndaj Bayer Leverkusenit. Sonte presim hapa përpara edhe në Champions League. Nuk do të jetë e lehtë kundër kampionëve në fuqi të Gjermanisë, por një tjetër paraqitje pozitive nga djemtë e Fonsecës do të jepte një shtysë të mëtejshme për pjesën tjetër të sezonit.

Ditët e fundit jemi dëshmitarë të dy rekordeve në historinë e klubit. I pari erdhi në fushë, me Theo Hernandez që barazoi Paolo Maldinin në numrin e golave ​​të shënuar në Serie A. Plot 29 në 5 sezone dhe së shpejti do të mund të bëhet i pari në absolut në mesin e mbrojtësve goleadorë të Milanit. Mirëpo tani, duhet filluartë me diskutimin e rinovimit me bindje më të madhe nga të dyja palët. Duhet gjetur një akord para se të jetë vonë. Ka besim, por nevojiten takime të mëtejshme për të arritur në shifrat e duhura për të kënaqur të dyja palët.

Rekordi tjetër erdhi në fushën financiare. Nuk ka ndodhur kurrë në historinë e klubit që Milani të prekte kuotën e 457 milionë euro të ardhura. Shifër mbresëlënëse nëse mendon se pesë vjet më parë Djalli sillte në shtëpi vetëm 240 milionë mes sponsorëve, iniciativave komerciale dhe të drejtave televizive. Një përmirësim i çmendur. Gjithashtu, për të dytin vit radhazi klubi i mbylli llogaritë në pozitiv. Nga ky këndvështrim menaxhimi ka qenë i përsosur. Do të duhej tani arritja edhe e objektivave në rezultatet sportive për t’i dhënë vazhdimësi punës së bërë gjatë këtyre muajve të fundit. Fitimi dhe ngritja e trofeve sjell entuziazëm dhe rrjedhimisht edhe më shumë të ardhura. E nëse nevojitet të bëhet ndonjë përjashtim nga rregullat edhe në merkato, le të bëhet.

E mbyllim me Joshua Zirkzee dhe zgjedhjen e tij të dyshimtë në verë për të zgjedhur paratë e United dhe jo projektin teknik kuqezi. Milani e kishte marrë po-në e lojtarit, ishin zhvilluar madje edhe disa takime ballë për ballë mes holandezit dhe Moncadës dhe Zirkzee pati përsëritur vazhdimisht se dëshironte të vinte te Milani. Në ndërtesën e klubit të rrugës Aldo Rosi ishin mjaft të sigurt për firmën e tij, derisa erdhi propozimi nga Mançesteri, i cili propozonte pagimin edhe të një komisioni të madh për agjentin dhe një pagë më të lartë për lojtarin. Ish Bolonja preferoi të pasurohet menjëherë duke rrezikuar të digjet në Mançester, klub që vitet e fundit ka qenë në vështirësi të mëdha. Morali është se starti i Zirkzee te United ka qenë një dështim i madh, deri më sot.

Milani, pasi pa hezitimin e Zirkzee,  zgjodhi të përqëndrohej mbi një lojtar me përvojë si Morata. Alvaro është një personazh pozitiv për mjedisin. Të gjithë do ta donin dikë të tillë, sidomos për sjelljen e tij shembullore gjatë javës. Morata ishte përkëdhelur madje edhe nga një ekip i kampionatit arab dhe për disa ditë Milani pati menduar se ishte me vonesë. Por më pas telefonata e Ibrahimovic, biseda mes dy sulmuesve, ku Zlatan i shpjegoi se do të bëhej pika referuese e skuadrës dhe Morata, që hoqi dorë nga gjithçka tjetër. Stop propozimeve të tjera, është vetëm Milan.