Milani ka vrapuar më shpejt se sa parashikimet. Sezoni ka sjellë më shumë buzëqeshje sesa dyshime, por në analizën e ftohtë të skuadrës del një e vërtetë e thjeshtë: mungon një “9” i vërtetë. Një bomber që të jetë pikë referimi, që të mbajë peshën e repartit ofensiv dhe të garantojë 20+ gola në sezon.
Në janar, klubi provoi të sillte Jean-Philippe Mateta nga Crystal Palace, por gjithçka u ndal për shkak të problemeve të dala në vizitat mjekësore. Një sinjal i qartë: nevoja ekziston dhe nuk mund të shtyhet më. Vera do të jetë momenti i zgjedhjes së madhe në via Aldo Rossi.
Objekti i dëshirës: Moise Kean, njeriu i Allegrit
Emri i parë në listë është ai i Moise Kean. Sipas raportimeve të “Tuttosport”, Max Allegri – që e njeh mirë nga koha te Juventusi – e kishte kërkuar që verën e kaluar. Tani pista rihapet.
Kean ka kontratë me Fiorentinën deri në vitin 2029 dhe një klauzolë prej 62 milionë eurosh, aktive nga 1 deri më 15 korrik. Një shifër e rëndësishme, por jo e paarritshme për një klub që kërkon të bëjë hapin cilësor përfundimtar. Sezoni aktual nuk i ka dhënë shumë kënaqësi sulmuesit italian, gjë që mund ta shtyjë të kërkojë një sfidë të re.
Profili i tij përputhet me idenë e Allegrit: fizik, i shpejtë, i aftë të sulmojë hapësirat dhe të luajë si referencë qendrore. Një “9” modern, por me instinkt klasik zone. Milani kërkon pikërisht këtë: një lider ofensiv që të kompletojë talentin e krahëve dhe fantazinë e mesfushës.
Nga Vlahovic te Nunez: pista të nxehta dhe ëndrra “top”
Por Kean nuk është i vetmi në radar. Emri i Dusan Vlahovic mbetet për t’u monitoruar. Serbi është në skadencë kontrate me Juventusin dhe situata e tij kontraktuale e bën një mundësi potenciale tregu. Një profil ndërkombëtar, me eksperiencë dhe instinkt të lindur për golin. Operacion i komplikuar, por jo i pamundur nëse hapet një dritare negociatash.
Në plan më të ri dhe më “taktik” është Pellegrino i Parmës, një investim për të ardhmen, një profil që mund të rritet brenda projektit kuqezi.
Pastaj janë dy emra që ndezin imagjinatën. Darwin Nunez, aktualisht te Al-Hilal, ka humbur hapësirë pas ardhjes së Karim Benzema në janar. Uruguaiani ka fizik, agresivitet dhe uri për rikthim në skenën e madhe evropiane. Do të ishte një goditje me peshë.
Dhe më pas Gabriel Jesus. Sulmuesi i Arsenalit ka kontratë deri në vitin 2027, por ka ndryshuar së fundmi agjent, duke kaluar në agjencinë e Branchini-t – i cili përfaqëson edhe Allegrin. Një detaj që në merkato ka gjithmonë peshë. Brazilianit nuk i mungon eksperienca në nivele të larta dhe do të sillte fleksibilitet, lëvizje dhe kulturë fituese.
Milani e di: për të konfirmuar rritjen dhe për të synuar trofe, duhet një qendërsulmues i madh. Jo thjesht një alternativë, por një simbol. Një “9” që të mbajë mbi shpinë pritshmëritë e San Siros.
Vera do të jetë vendimtare. Mes klauzolash, kontratash në skadencë dhe mundësish të papritura, drejtuesit kuqezi po përgatisin lëvizjen që mund të ndryshojë fytyrën e skuadrës. Sepse në fund, në futbollin italian si në Evropë, diferencën e bën gjithmonë ai që e dërgon topin në rrjetë. Dhe Milani, për hapin e madh, ka nevojë për bomberin e tij.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
