Ardon Jashari duhej të ishte një nga shtyllat e reja të Milanit, një investim për të tashmen dhe të ardhmen. I transferuar nga Club Brugge për rreth 38 milionë euro, mesfushori zviceran mbërriti në “San Siro” me pritshmëri të mëdha dhe me etiketën e një profili modern, teknik dhe inteligjent taktikisht. Por realiteti, të paktën deri më tani, ka qenë krejt ndryshe. Mes dëmtimeve serioze, konkurrencës së fortë dhe zgjedhjeve të Massimiliano Allegrit, Jashari është shndërruar në një enigmë të vërtetë për tifozët kuqezi.
Një investim i rëndësishëm që ende nuk po kthehet në fushë
Kur Milani vendosi të shpenzonte afro 38 milionë euro për Ardon Jasharin, ideja ishte e qartë: të sillte në mesfushë një regjis të ri, të aftë të diktonte ritmin dhe të garantonte vazhdimësi në vitet në vijim. Megjithatë, dëmtimi i rëndë i pësuar në fillim të sezonit i ka prishur planet jo vetëm lojtarit, por edhe stafit teknik.
More Read
Jashari nuk ka arritur ende të bindë Allegrin dhe bashkëpunëtorët e tij, jo domosdoshmërisht për mungesë cilësie, por për shkak të gjendjes fizike dhe mungesës së ritmit të lojës. Në një skuadër që kërkon rezultate të menjëhershme, durimi shpesh është luks.
Problemi taktik dhe konkurrenca në mesfushë
Një tjetër element kyç është aspekti taktik. Në skuadrën aktuale të Milanit, Ardon Jashari gjendet përballë një realiteti të vështirë: në organikë janë edhe Ricci dhe Luka Modrić, dy lojtarë që mbulojnë të njëjtin rol – atë të regjisorit. Dhe duke qenë se Allegri zakonisht aktivizon vetëm një regjis në skemën e tij, llogaritë bëhen shpejt.
Me Modrić, një kampion me përvojë të jashtëzakonshme, dhe Riccin që gëzon më shumë besim aktualisht, hapësirat për Jasharin janë zvogëluar ndjeshëm. Kjo shpjegon edhe faktin pse, si në ndeshjen ndaj Cagliarit ashtu edhe në barazimin kundër Genoas, mesfushori zviceran nuk u aktivizua aspak.
“Objekti misterioz” i Milanit: shifrat flasin qartë
Deri më tani, Ardon Jashari ka regjistruar vetëm pesë paraqitje me fanellën kuqezi, duke grumbulluar gjithsej 216 minuta lojë. Një bilanc shumë i varfër për një lojtar të këtij kalibri dhe për një investim kaq të madh financiar.
Sigurisht, rikthimi pas një dëmtimi serioz nuk është i lehtë, por njëkohësisht Jashari ka nevojë jetike për minuta në këmbë. Vetëm përmes lojës ai mund të rifitojë besimin, formën dhe të tregojë se mund të jetë i dobishëm për kauzën e Milanit.
Nevoja për rotacion dhe roli i Modrić
Një tjetër aspekt që flet në favor të Jasharit është mosha e Luka Modrić. Kroati mbetet një kampion i jashtëzakonshëm, por nuk është i përjetshëm. Milani ka nevojë për rotacione, për të ruajtur freskinë fizike të mesfushës dhe për të shmangur rreziqet e mbingarkesës.
Në këtë kontekst, Jashari mund dhe duhet të shërbejë si alternativë natyrale, një lojtar që i jep frymëmarrje skuadrës dhe që gradualisht merr më shumë përgjegjësi.
Presenca e fundit dhe shpresa për rikthim
Paraqlitja e fundit e Ardon Jasharit me fanellën e Milanit daton më 18 dhjetor, në gjysmëfinalen e Superkupës së Italisë kundër Napolit. Që nga ajo ndeshje në Riad, mesfushori zviceran është zhdukur nga radarët e fushës.
Megjithatë, përballja e ardhshme kundër Fiorentinës mund të shënojë një pikë kthese. Me mundësinë që Modrić të nisë nga pankina, Allegri mund të vendosë të “shkundë pluhurin” nga Jashari dhe t’i japë atij një shans të shumëpritur.
Rasti që nuk duhet djegur
Milani, më shumë se kurrë në këtë moment të sezonit, ka nevojë për ndryshime dhe rotacione në mesfushë. Ardon Jashari, edhe pse ende jo në formën më të mirë, mund të rezultojë një burim i rëndësishëm energjie dhe alternative.
Pyetja mbetet e hapur: a do të arrijë Jashari të dalë nga hija e “objektit misterioz” dhe të tregojë pse Milani besoi kaq shumë tek ai? Përgjigjja, me shumë gjasa, do të vijë vetëm nga fusha.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
