Milan, më në fund e kuptove: kemi nevojë për lojtarë funksionalë, jo për figura në fushë

Marshi duket se ka ndryshuar. Merkato Milan hapet me goditjen e parë: Alvaro Morata. Sulmuesi i shumëkërkuar, pasardhësi i mezipritur i Olivier Giroud, më në fund është gjendur. Mungon ende gjëja më e rëndësishme, ndryshe thënë, zyrtarizimi, por stuhia e paralajmëruar nga Zlatan Ibrahimoviç, në rrjetet sociale siç e ka zakon, ka mbërritur në Casa Milan dhe qark saj.

Jo më figura, jo më lojtarë që shesin fanella dhe kaq. Milani blen një sulmues të vlefshëm, një nga ata të modës së vjetër: vendosmëri, djersë dhe gola. Të jemi të qartë, as Joshua Zirkzee nuk do të kishte qenë thjesht figurë, pasi ishte i ri dhe me cilësi të lartë. Sidoqoftë, politika e kuqezinjve lidhur me komisionet nuk bëri të mundur që marrëveshja të mbyllej, kështu që qendërsulmuesi holandez zgjodhi të largohej për në Angli, drejt Manchester United.

Do ta kapërcejmë edhe këtë, për fat të keq, ani pse e gjithë Seria A po humbet një pjesë të vlefshme. Zirkzee tani është e kaluara, kështu që le t’i kthehemi të tashmes. Merkato për sulmuesit kuqezinj nuk do të përfundojë me Moratën, pasi Djalli synon të nënshkruajë edhe me një qendërsulmues të dytë. Emri më i njohur për momentin është ai i Niclas Fullkrug, një tjetër profil shumë “antipatik”. Lojtari gjerman është një qendërsulmues i ‘lig’, sigurisht jo i gjelbër, por i aftë për ta çuar topin në rrjetë në çdo mënyrë dhe mbi të gjitha atëherë kur duhet.

Milani pra duket se e ka kuptuar: kjo skuadër ka nevojë për futbollistë konkretë. Nuk e dimë, të paktën për tani, nëse këto zgjedhje janë peshuar më shumë nga Zlatan Ibrahimoviç, dikush që ka qenë gjithmonë konkret përveçse spektakolar, por rruga duket se është e qartë. Nga sulmi kalojmë në mesfushë, pasi dy profilet e përzgjedhura janë shumë të ndryshëm dhe padyshim jo alternativë të njëri-tjetrit: Youssouf Fofana dhe Lazar Samarxhiç.

Sasi dhe cilësi

I pari është një mesfushor i fortë, një lojtar që, për nga karakteristikat, i ka munguar Milanit që nga koha e Kessié. Ndërsa i dyti, është një mesfushor sulmues, gjysmë anësor me shumë fantazi. Tani, duhet evidentuar se të dy profilet e përmendura janë e kundërta e njëri-tjetrit. Fofana është 25 vjeçe dhe sapo ka hyrë në rrugën e maturimit. I nevojitet, e ç’të nevojitur se, kuqezinjve për të dhënë ekuilibër në mesfushë. Ndërkohë që Samarxhiç, përkundrazi, është një tjetër prototip që Milanit i ka munguar që nga Brahim Diaz: një playmaker i zoti për të krijuar rrëmujë në mesfushën kundërshtare. Siç thamë më lart, lojtarë konkretë dhe funksionalë.

Egërsi mbrojtëse

E mbyllim me mbrojtjen, pasi në pol janë edhe dy emra të tjerë. I pari është Strahinja Pavlovic, një puro mbrojtës dhe solid. Salzburgu nuk duket se do lëshojë prej kërkesave të tij për 30 milionë euro, por merkato sapo ka nisur dhe mund të ketë kthesa të rëndësishme, edhe sepse Milani tashmë ka arritur një marrëveshje paraprake me futbollistin.

I dyti, së fundi, është Mario Hermoso, i çliruar së fundmi nga kontrata me Atletico Madridin. Për klasin ’95 ka shumë konkurrencë italiane, me dyshen Napoli-Inter në gjurmët e lojtarit. Megjithatë, blerja e mundshme e Hermoso do të sillte përvojë të madhe në prapavijën e Milanit pas largimit të një senatori si Simon Kjaer. Edhe në këtë rast gjendemi përballë zgjedhjeve që synojnë konkreten. Të dy, si Pavloviç dhe Hermoso përfaqësojnë profile që aktualisht mungojnë në skuadrën kuqezi: mbrojtës të ashpër dhe pa fre. Me pak fjalë, Milani po tregon rrugën dhe së shpejti do të shohim nëse do të ndalet apo jo kur të përballet me pengesa të reja.