Merkato, Conte i paraprin Milanit: “Do të shpenzojë 150 milionë për…”

Është gjithmonë hija e Antonio Contes që sillet në orbitën Milan dhe lajmet e fundit po e konfirmojnë edhe një herë. Trajneri salentin është i etur për t’u rikthyer që të stërvisë dhe klubi kuqezi – me përjashtim të të papriturave të bujshme – së shpejti do të duhet të vendosë për trajnerin e tij të ri. Stefano Pioli efektivisht ka pak shanse për të qëndruar në krye dhe në fund të sezonit mund të ndodhë një divorc që shumë po e kërkojnë prej kohësh.

Conte, siç kemi thënë, do të ishte ndër emrat më të pëlqyer për pas-Piolin. Sigurisht, është ai më i rëndi, ai që ndan, që shkakton diskutime, por edhe ai që ka peshën më të madhe ndër ata që aktualisht janë në merkato. Dhe kush mund të bëjë diferencën? Mund të jetë pikërisht vullneti i Zlatan Ibrahimoviç, i cili – siç konfirmohet nga deklaratat e Cardinales – do të ketë një rol themelor në vendimet e ardhshme të Milanit. Ibra do të donte të prezantohej me një profil të madh, me një trajner prestigjioz që është sinonim i ambicieve dhe i fitoreve. Dhe, na pëlqen apo jo, Antonio Conte i përgjigjet në mënyrë perfekte këtij identikit.

Jo rastësish i preferuari i Ibrahimoviç do të ishte pikërisht Conte, me të cilin tashmë do të ketë pasur disa kontakte javët e fundit. Por një si Antonio Conte do të kishte edhe kërkesa shumë të rëndësishme për të plotësuar. Jo aq për sa i përket rrogës, por mbi të gjitha për projektin dhe investimet në merkato. Në lidhje me këtë, orët e fundit ka dalë një lajm që zbulon se cilat do të ishin kërkesat për transferimin e Contes te Milani.

Merkato prej 150 milionësh

Për këtë ka folur eksperti i njohur i merkatos Nicolò Schira, i cili në kanalin e tij YouTube ka zbuluar: “Nëse vjen një ofertë prej të paktën 80 milionësh për Maignan ose Theo Hernandez, ndjesia është se njëri prej të dyve mund të shitet për të financuar një merkato të rëndësishme prej 150 milionë eurosh. Dhe është pikërisht kjo shifra që Antonio Conte i ka kërkuar si investim klubeve që kanë kontaktuar me të. Ai dëshiron një lloj merkatoje për të blerë 4 – 5 titullarë. Merkato Milan do të jetë prej 50 milionë cash – ato të përfituara nga Champions – plus të ardhura nga shitjet. Me shpagimin e 10 milionëve nga Saelemaekers plus 23 milionët e De Ketelaere, tashmë do të ishim mbi 80 milionë në buxhet. Pastaj, nëse mbërrin një ofertë prej të paktën 80 milionësh të tjera për Theo Hernandez ose Maignan, Milani mund ta bëjë atë lloj merkatoje”.