Në futboll, ashtu si në jetë, ka dashuri që nuk harrohen dhe që lënë gjurmë të pashlyeshme tek kushdo që i ka përjetuar nga afër dhe jo vetëm mes protagonistëve të drejtpërdrejtë. Milani e di mirë këtë, duke qenë se në historinë e tij ka pasur disa kampionë legjenda dhe të paharrueshëm për shumë tifozë, të cilët kanë shkruar historinë e klubit, duke ngritur në qiell kupat e Skudetove dhe Champions League.
Mario Balotelli nuk mund të jetë midis legjendave të të klubit, por ndjesia është se me pak më shumë vazhdimësi dhe me fat mund ta kishte bërë lehtësisht. Cilësitë e tij teknike dhe fizike janë shfaqur të jashtëzakonshme që në debutimin e tij me fanellën e Interit dhe edhe në disa paraqitje me Manchester City, Italinë dhe Milanin, ku megjithatë nuk arriti të bënte asnjëherë kapërcimin cilësor drejt një fenomeni absolut, siç do ta kishte pritur a menduar shumëkush.
Sot është 33 vjeç dhe që nga 1 korriku është një lojtar i lirë pas përvojës në Adana Demirspor. Ka pas veshur fanellën e Milanit nga nga janari 2013 deri në gusht 2014 përpara se të transferohej në Liverpool dhe të rikthehej në formë huazimi te kuqezinjtë, pa shumë fat. Që aty nisi parabola e tij zbritëse nga e cila nuk u ringjit kurrë, por… zemrën mund ta komandosh.
Balotelli bëri emër në futbollin që ka rëndësi me Interin, ku pati bërë edhe debutimin e tij nën drejtimin e Roberto Mancinit e më pas fitoi Champions League me José Mourinhon, pavarësisht një marrëdhënieje të trazuar. Megjithatë, nuk e ka fshehur kurrë se besimi i tij futbollistik shikonte nga ana tjetër e urës, pra pikërisht drejt Milanit.
Pavarësisht eksperiencave të ndryshme futbollistike larg, Super Mario nuk ka reshtur kurrë së ndjekuri skuadrën e tij të zemrës dhe kur të mundet, rikthehet me kënaqësi për të përshëndetur kolegët e tij dhe për të rijetuar mjedisin kuqezi. E bëri këtë edhe të dielën e 4 gushtit, teksa u shfaq në qendrën stërvitore të Milanit dhe më pas publikoi një selfie në rrjetet e tij sociale për të përjetësuar ngjarjen.
Milani është ende në kërkim të një sulmuesi pas krahëve të Alvaro Moratës, por mos mendoni për asnjë referencë për sa i përket merkatos. Balotelli është vetëm një tifoz dhe mik i klubit, i cili do të duhet të gjejë shtëpi diku tjetër për të ringjallur karrierën e tij.
