Kampionët e Milanit që mund të ishin të Leverkusenit: si ndryshoi fati i tyre

Fati i dy prej lojtarëve më përfaqësues të Milanit të djeshëm dhe të sotëm mund të kishte marrë rrugën për në Leverkusen. Dhe do të kishte qenë pothuajse e siguritë një histori tjetër: po flasim për Kaka dhe Theo Hernandez, sidoqoftë sërish kuqezinj, por “djaj” dhe jo “aspirina”.

Historia e brazilianit daton që nga viti 2002. Bayer Leverkusen ka qenë gjithmonë një port i hapur ndaj futbollistëve brazilianë: Tita, që më vonë u transferua në Pescara, e lidhi emrin e tij me Kupën UEFA të fituar në 1988 duke i dhënë rrugë revanshit në finale kundër Espanyolit. Pastaj janë edhe Jorginho, Emerson, Paulo Sergio, Lucio, Zé Roberto. Në verën e vitit 2002, klubi mori në dorë disa lojtarë të futebol bailado: Juan (që do ta shohim edhe te Roma) nga Flamengo, ndërsa nga Sao Paulo sytë e tyre ranë mbi sulmuesin França dhe mbi mesfushorin sulmues Kakà. Ky i fundit pati impresionuar skautët dhe jo vetëm. Në fakt, tek talenti brazilian kishin parë një zëvendësues të mundshëm të yllit të atëhershëm, Michael Ballack, i destinuar të kalonte te Bayern Munich.

Për të krijuar një ide sa më të qartë se sa afër pati qenë Kakà me Leverkusenin, mjafton të mendoni se trajneri i Leverkusenit në atë kohë, Klaus Toppmoller, nuk e mbajti veten: “Është një lojtar impresionues dhe mund të shënojë me të njejtën shpeshtësi si Ballack. Është në krye të listës sonë të dëshirave”. Vetë lojtari kishte shprehur synimin e tij për t’u transferuar në Evropë. Ai mund të kishte ardhur për 9 milionë euro, por klubi nuk pranoi. “Nuk kishim para të mjaftueshme”, deklaroi drejtori i përgjithshëm në atë kohë, Reiner Calmund. Dhe kafshon duart. Do të vijë te Milani një vit më vonë, për 8.5 milionë. Pjesa tjetër është histori.

Një hap larg Bayer Leverkusenit, në fakt, ishte edhe Théo Hernandez. Praktikisht ishte e mbaruar po të mos kishte ndodhur ndërhyrja e famshme e Paolo Maldinit në verën e vitit 2019. Këtë e ka pranuar edhe vetë francezi, i cili në një intervistë ka deklaruar: “Isha shumë afër transferimin në Bayer Leverkusen, por ai (Maldini, red.) përmbysi gjithçka. Erdhi e më takoi gjatë pushimeve dhe folëm shumë. E kuptova menjëherë se duhej të shkoja te Milan”. Lojtari ishte rikthyer te Real Madridi pas huazimit te Real Sociedad, por nuk ishte pjesë e planeve të Los Blancos, aq sa patën arritur një akord me gjermanët për transferimin e lojtarit për 20 milionë euro. Takimi në Ibiza mes drejtuesit të kuqezinjve dhe lojtarit ndryshoi historinë. Të premten kundër Leçes ai shënoi golin e tij numër 29 në Serinë A, duke barazuar vetë Paolo Maldinin, i cili e komplimentoi në Instagram: “I madh Teo. Diferenca e vogël është se mua m’u deshën 25 vjet, kurse ty të mjaftuan 5. Je special!”. Dhe kush e di nëse Theo nuk do t’i ngjajë Maldinit edhe për nga besnikëria ndaj Milanit. Ai ka thënë se është: “Shumë i lumtur”.