Ka mënyra të ndryshme për të nisur një aventurë të re. Niclas Füllkrug zgjodhi më të drejtpërdrejtën: hyrje në fushë, duel fizik, ndikim i menjëhershëm dhe tre pikë në xhep.
MIRËSEARDHJE NË STIL MILAN: DEBUTIM, FITORE DHE BUZËQESHJE
Në të njëjtën ditë erdhi zyrtarizimi i huazimit me të drejtë blerjeje nga West Ham, depozitimi i kontratës në Lega Serie A, debutimi me fanellën kuqezi dhe fitorja ndaj Cagliarit. Një “buona la prima” e pastër.
Milani e kishte pritur si një nevojë konkrete dhe jo si një sprovë. Dhe gjermani, me fanellën numër 9 mbi shpinë, u paraqit ashtu siç e do futbolli italian: i gatshëm për betejë.
NJË ARRITJE E MENAXHUAR ME INTELIGJENCË
Füllkrug kishte mbërritur në Itali para Krishtlindjeve. Një detaj jo i vogël. West Ham tregoi fleksibilitet, duke i lejuar sulmuesit të stërvitej në Milanello edhe përpara zyrtarizimit. Kjo i dha mundësinë të njihej me ambientin, shokët e skuadrës dhe kërkesat e Allegrit pa presion.
Igli Tare e pranoi hapur para ndeshjes:
“Na ka surprizuar për entuziazmin dhe praninë fizike. Ka shumë eksperiencë, është një lojtar që e ndjen zonën. Aktualisht ka 30-40 minuta në këmbë, por është gati për të dhënë kontribut.”
Një lëvizje e planifikuar mirë, me logjikë dhe vizion afatshkurtër e afatgjatë.
FULLKRUG NË SERIE A: PA KOHË PËR ADAPTIM
Kur hyri në fushë, ndeshja ishte ende e hapur dhe terreni i Unipol Domus nuk fal askënd. Por Füllkrug nuk kërkoi kohë: menjëherë trup më trup me Luperto dhe mbrojtësit e Cagliarit, mbrojtje topi, duele ajrore, presion konstant.
Kjo është Serie A për qendërsulmuesit: e ashpër, fizike, pa dhurata. Gjermani e kuptoi menjëherë dhe u fut në mentalitet pa u menduar dy herë. Pikërisht ajo që Allegri kërkon nga një “9” i pastër.
ALLEGRI I KËNAQUR: “U FUT SHUMË MIRË”
Massimiliano Allegri, me buzëqeshjen e tij karakteristike, e vlerësoi debutimin e Fullkrug:
“Hyri shumë mirë. Nuk kisha dyshime. Në duelet ajrore dhe në mbrojtjen e topit ishte shumë i dobishëm. Është një lojtar i fortë, e dimë këtë. Ka ardhur prej pak ditësh, por është futur menjëherë në grup.”
Në përkthim: Allegri tani ka një armë tjetër. Një qendërsulmues që di të luftojë, të mbajë skuadrën lart dhe të bëjë punë “të pista” kur ndeshja e kërkon.
ENTUZIAZMI I NUMRIT 9: “NDIHEM SI NË SHTËPI”
Pas ndeshjes, Füllkrug nuk e fshehu emocionin:
“Debutim perfekt, fillim perfekt i vitit. Jam shumë i nderuar që luajta menjëherë. Ndihem si në shtëpi, edhe pse ende nuk kam luajtur në San Siro. Nuk shoh orën për këtë moment.”
Fjalë të thjeshta, por të sinqerta. Dhe për tifozët kuqezi, një sinjal i bukur.
PJESA QË I MUNGONTE MOZAIKUT
Fullkrug nuk erdhi për të qenë ylli absolut, por për të plotësuar Milani-n. Një sulmues me trup, eksperiencë dhe mentalitet ndërkombëtar. Një profil që i jep Allegrit alternativa reale gjatë ndeshjeve dhe një pikë referimi në zonë.
Fillimi është premtues. Pa fishekzjarre, por me goditje të forta. Pikërisht siç i pëlqen Allegrit. Dhe ndoshta, edhe tifozëve kuqezi.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
