Atëherë, pra, paska jetë edhe përtej emrave të mëdhenj. Jo vetëm Milani i Pulisic, Leao, Modrić dhe Rabiot – shtyllat që mbajnë peshën e shtëpisë kuqezi dhe që nuk mund të zhvendosen pa rrezikuar ekuilibrin.
Një Milan që nuk mbështetet më vetëm te yjet
Por edhe një Milan tjetër, më pak i zhurmshëm, më pak i dukshëm, por po aq vendimtar. Një Milan që fiton falë atyre që deri dje quheshin “linja e dytë”.
More Read
Ndeshja kundër Lecce-s e ka thënë qartë: kjo skuadër ka më shumë zgjidhje sesa mendohej. Dhe për një trajner si Massimiliano Allegri, kjo nuk është luks, por oksigjen i pastër. Në një sezon ku gara për Scudetto është bërë serioze dhe ku ritmi i ndeshjeve e detyron menaxhimin kirurgjikal të energjive, thellësia e organikës bëhet armë.
Pesë ndërrime që ndryshojnë fatin e ndeshjeve
Allegri e kishte paralajmëruar që në vigjilje: sot ndeshjet nuk fitohen vetëm me formacionin fillestar. Pesë ndërrimet kanë ndryshuar ADN-në e futbollit modern. Mund të transformosh një ndeshje, ta përmbysësh ritmin, ta godasësh aty ku kundërshtari lodhet.
Si në Como, ashtu edhe kundër Lecce-s, Milani e bëri pikërisht këtë. Goli vendimtar erdhi nga pankina. Nga Füllkrug. Dhe pyetja lind natyrshëm: a është ende “rezervë” gjermani, me Leao-n jo në kushte ideale? Kontributi nga pankina ishte pothuajse perfekt. Do të kishte qenë edhe më i pasur, po të mos ishte ai “liscio” i pabesueshëm i Loftus-Cheek, me portën bosh, dhe po të mos ishte dy herë i murrosur Nkunku në minutat finale, kur një gol i dytë do të kishte mbyllur gjithçka pa ankth.
Füllkrug dhe Nkunku: zgjidhjet kur mungon shkëlqimi
Megjithatë, Nkunku kishte bërë tashmë pjesën e tij në Como, duke mbajtur Milanin në vijë lundrimi me një penallti që peshonte sa plumbi. Dhe kështu, Nkunku e Füllkrug janë përgjigjja konkrete ndaj një momenti më pak brilant – por jo të dënueshëm – të Pulisic dhe Leao.
Shifrat flasin qartë: 15 gola të shënuar së bashku nga dy lojtarë që nuk janë qendërsulmues janë një pasuri e madhe në gjysmën e sezonit. Sigurisht, ndonjë gabim ka qenë – si ai i Pulisic, kur Falcone bëri një gjysmë mrekullie dhe amerikani zakonisht do ta kishte vendosur më mirë topin në cep. Dhe më e dhimbshme për sytë ishte vuajtja e Leao-s, i kufizuar dukshëm nga aduktori. Pikërisht këtu hyn në lojë rëndësia e atyre që nuk jetojnë nën dritat e reflektorëve çdo javë.
Ricci dhe Jashari: substancë, jo fishekzjarrë
Diskursi ndryshon në mesfushë. Këtu nuk bëhet fjalë për ndërrime shpëtuese, por për titullarë që kërkojnë të shenjtërohen. Ricci dhe Jashari, të hedhur nga minuta e parë në vend të Fofana-s, Loftus-Cheek dhe madje të vetë Modrić-it, kanë dërguar një mesazh të qartë.
Jashari, pavarësisht dy topave të humbur rëndë, ofroi një ndeshje me substancë, ritëm dhe dy faza. Një sinjal i fortë për botën kuqezi: sa më shumë luan, aq më efektiv bëhet. Ricci, nga ana tjetër, është mjeshtër i punës së errët. Nuk kërkon duartrokitje, nuk kërkon faqe gazetash. Lë spektaklin për të tjerët dhe qep e pret mesfushën me një efikasitet të çmuar.
Turnover si art: ja se si zgjedhjet e Allegrit japin gjithmonë fryte
Të gjitha këto janë pasoja direkte të turnover-it që Allegri ka qenë i detyruar të aplikojë në dy javë me ndeshje të dendura. Dhe trajneri livornez, mjeshtër i menaxhimit, ka nxjerrë maksimumin nga kjo situatë.
Detaj jo i vogël, por shumë domethënës: Ricci dhe Jashari mund të luajnë si përpara mbrojtjes, ashtu edhe si mesfushorë krahu. Fleksibilitet taktik që hap skenarë të rinj dhe i jep Milanit alternativa reale, jo vetëm teorike.
Po, ka jetë përtej “të zakonshmëve”
Po, ka jetë në Milanello edhe përtej emrave të mëdhenj. Dhe kjo ndryshon gjithçka. Sepse një skuadër që synon Scudetton nuk mund të jetojë vetëm nga yjet e saj, por nga forca kolektive, nga ata që hyjnë në heshtje dhe dalin duke lënë gjurmë.
Füllkrug, Jashari, Ricci: mos i quani më “linja e dytë”. Janë pjesë e një Milani që tani sheh lart pa u ndrojtur. Dhe kur thellësia bëhet cilësi, ëndrra e titullit pushon së qeni thjesht një fjalë e madhe.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
