E në qoftë nata e penalltive kjo sonte në Riad, cilat do të ishin zgjedhjet e Allegrit dhe Contes? Maignan kundër Milinkovic, ja yjet e Milanit dhe të Napolit drejt pikës së bardhë

Riad përgatitet të jetë skena e një nate të madhe ku futbolli do të zhvishet nga çdo skemë dhe do mbetet vetëm përballë përgatitjes apo fatit, nervave dhe personalitetit.

Një finale para finales

Milani dhe Napoli do të sfidohen në gjysmëfinalen e Superkupës Italiane me një vetëdije të qartë: nëse 90 minutat nuk do mjaftojnë, gjithçka do të vendoset nga pika e bardhë. Penalltitë, lotaria më mizore dhe më e vërtetë e futbollit, do të ishin gati të shkruanin verdiktin.

Përballë, dy skuadra me ambicie të mëdha, dy trajnerë me përvojë dhe filozofi të ndryshme, Allegri dhe Conte, që dinë mirë se këto ndeshje nuk fitohen vetëm me këmbë, por edhe me kokë. Në portë janë dy gardianë të frikshëm, si Maignan dhe Milinkovic-Savic, specialistë të momentit ekstrem.

Çdo goditje në ndeshje do të jetë një provë karakteri, çdo hap drejt topit një duel me veten. Në Riad nuk luhet vetëm për një finale, por për prestigj, besim dhe një sinjal të fortë për vazhdimin e sezonit. Por si do të rreshtoheshin skuadrat në rast barazimi:

Dy mure në portë: Maignan dhe Milinkovic-Savic

Nga njëra anë Mike Maignan, lider, kapiten dhe specialist i penalltive, nga ana tjetër Milinkovic-Savic, portier me fizik dhe intuitë që tashmë ka “lexuar” edhe Pulisic në të kaluarën. Dy emra që e bëjnë çdo penallti një duel psikologjik përpara se të jetë teknik.

Milan, të besuarit e Allegrit:

Pulisic, lideri i heshtur

Te Milani, Christian Pulisic mbetet një nga kandidatët kryesorë për të hapur ose mbyllur serinë. Statistikat janë solide, edhe pse dy gabime peshojnë. Por amerikanin nuk e tremb presioni, përkundrazi, ai shpesh ushqehet prej tij. Në karrierë ka gjuajtur 15 penallti. Dy gabimet e vetme i ka bërë pikërisht kundër Milinkovic-Savic (atëherë te Torino) dhe në këtë kampionat, kur gjuajti mbi traversë kundër Juventusit.

Modric, përvoja që peshon sa një titull

Nëse ka një emër që Allegri do ta donte gjithmonë pranë pikës së bardhë, ai është Luka Modric. Pas 13 sezonesh te Real Madrid, sezoni i parë kuqezi për kroatin 40-vjeçar. Nga të gjithë, ai që ka gjuajtur më shumë penallti në karrierë: 24 të shënuara dhe 6 të humbura. Kroati është siguria më e madhe emocionale e Milanit te penalltitë.

Rabiot, Salelemaekers, emra të rinj për penalltitë

Rabiot dhe Saelemaekers nuk kanë histori nga pika e bardhë, por ndonjëherë pikërisht mungesa e së shkuarës mund të jetë një avantazh.

Edhe Nkunku, me bilanc pozitiv, përfaqëson një opsion të besueshëm për momentet vendimtare, nga pika e bardhë ka shënuar 12 herë dhe ka gabuar 3.

Napoli, të besuarit e Contes

Te Napoli, Antonio Conte mbështetet te lojtarë që kanë treguar personalitet. Politano është një veteran i penalltive, bilanci i tij nga pika e bardhë: 10 penallti të shënuara dhe 4 të humbura. Lang ka statistika bindëse, në karrierë ka gjuajtur 9 penallti: bilanci 7 gola dhe 2 gabime, ndërsa McTominay ka shndërruar në gol të vetmen mundësi të tij. Hojlund, në karrierë ka gjuajtur tre penallti, duke gabuar njërën, në Champions League në sfidën e fundit të fituar kundër Qarabag.

Hijet e gabimeve të fundit

Rasti i Neres është emblemë e presionit: pa eksperiencë në 90 minuta, por me një gabim të freskët në Kupën e Italisë. Në penallti, kujtesa është armiku më i madh.

Lotaria që vendos një sezon

Penalltitë nuk janë vetëm goditje. Janë histori, emocione, dështime të shkuara dhe shpresa të ardhshme që përplasen në disa sekonda. Milani dhe Napoli e dinë mirë: sonte në Riad, një sezon mund të ndryshojë drejtim nga një hap i vetëm drejt topit. Dhe kur përballë janë Maignan dhe Milinkovic-Savic, asgjë nuk është e sigurt.