E fundit e të “nënvlerësuarit” Kjaer dhe të “mbaruarit” Giroud: Milani përcjell dy gjigandë të rilindjes kuqezi

Të shtunën mbrëma në San Siro do të luhet ndeshja e fundit e kampionatit të Milanit kundër Salernitanës. Në fushë ka shumë pak për të thënë duke qenë se kuqezinjtë e kanë të mbyllur edhe matematikisht në vendin e dytë kampionatin, ndërsa kampanët tashmë prej disa javësh janë aritmetikisht të rënë në Serie B. Por kjo ndeshje sërisht do të ketë një domethënie të veçantë për klubin kuqezi i cili përveç Stefano Piolit, do t’i japë lamtumirën edhe dy protagonistëve absolutë të rilindjes së Djallit në sezonet e fundit. Po flasim për Simon Kjaer dhe Olivier Giroud.

KJAER – I ardhur në Milanello në janar 2020 bashkë me Zlatan Ibrahimoviç, mbrojtësi danez u prit plot me dyshime nga tifozët e Milanit, të cilët prisnin shumë më tepër për të përforcuar mbrojtjen milaniste. Por në fakt Kjaer u bë menjëherë një lider i skuadrës kuqezi si brenda dhe jashtë fushe. Rëndësia e tij në rilindjen e Djallit ka qenë shpesh e nënvlerësuar, por një me personalitetin e tij do të mungojë shumë në brendi të dhomës së zhveshjes milaniste. Fatkeqësisht, pas dëmtimit të rëndë të gjurit në dhjetor 2021, danezi nuk u rikthye më në nivelet e tij, por sidoqoftë ia arriti të ishte vendimtar në rezultatet pozitive të viteve të fundit.

GIROUD – Në fund të këtij sezoni, Milani do të humbasë edhe një lider tjetër të skuadrës, që është qendërsulmuesi golashënues i skuadrës, Olivier Giroud. I ardhur në verën 2021, edhe ai fillimisht nuk u gjykua si një blerje e madhe prej tifozëve kuqezi, të bindur se Djalli kishte nevojë për një qendërsulmues më të ri i cili të mund të përfaqësonte të tashmen dhe të ardhmen e klubit të rrugës Aldo Rossi. Por edhe francezit, i cilësuar madje edhe si i “mbaruar” nga disa, iu desh shumë pak për t’u vlerësuar nga tifozeria milaniste, që do të duhet ta falenderojnë për jetë atë, për të gjithë golat e rëndësishëm të shënuar në vitin skudetos (dygolëshi i tij në derbi do të mbetet në histori).

PËRSHËNDETJA QË MERITOJNË – Si Kjaer edhe Giroud në intervistat e ditëve të fundit, në të cilat kanë shpallur lamtumirën, nuk e kanë fshehur dashurinë për Milanin prandaj dhe të shtunën, meritojnë të përshëndeten në mënyrën më të mirë të mundshme, ashtu si edhe Stefano Pioli. Curva Sud, që po proteston prej javësh kundër klubit, do të vazhdojë të qëndrojë e heshtur gjatë pjesës së parë të ndeshjes kundër Salernitanës, e më pas, në pjesën e dytë do të rikthehen flamujt, pankartat dhe këngët për të përshëndetur tre protagonistët e mëdhenj të rilindjes rosonere.