Verë e nxehtë në Horizonin e Milanos. Kurse tifozët kuqezi presin me padurim përfundimin e këtij sezoni frustrues, drejtuesit e klubit po punojnë fshehurazi në planin më ambicioz të merkatos së fundit: gjetja e bomberit të huaj që do të transformojë sulmin e Milanit nga një makinë e mangët në një motor golash. Pas viteve të tëra zhgënjimesh, blerjesh të dështuara dhe eksperimenteve të kushtueshme, kjo është hera e fundit që klubi mund të lejojë vetes një gabim tjetër në këtë pozicion kaq kritik.
Mungesa e një sulmuesi të vërtetë, atij që e nis ndeshjen me avantazhin 1-0 që nga minuta e parë, ka qenë plagë e hapur gjatë gjithë këtij sezoni. Veçanërisht kundër ekipeve të vogla – atyre që teoricisht duhet të mposhtesh pa diskutim – Milani ka vuajtur një torturë psikologjike. Pikët e humbura kundër skuadrave të fundit të renditjes kanë dëshmuar se sa i nevojshëm është një vrasës i zonës, dikush që transformon gjysmë rastet në gola dhe i jep ekipit atë siguri që mungon prej kohësh.
Por realiteti i tregut është brutal. Listës së kandidatëve i mungon ajo cilësi magjike që kërkon një klub me pretendime titulli.
Kean, është një emëe që qarkullon me zhurmë nëpër korridoret e Casa Milan. Por ai vjen me dyshime të mëdha fizike dhe një historik golash që nuk bind plotësisht. A mund të garantojë 20+ gola në sezon? Pyetja qëndron pezull.
Retegui, alternativa tjetër, mund të ketë më shumë instinkt golash në këmbët e tij, por kostoja e tij është thuajse prohibitive për buxhetin kuqezi. Përveç kësaj, asnjë prej tyre nuk ofron atë “siguri absolute” që klubi ka nevojë kaq urgjentë.
Castro i Bolonjës shfaqet si një diamant i papunuar – talent i jashtëzakonshëm, por ende në fazën e 10 golave sezonalë dhe pa eksperiencën e nevojshme për të mbajtur peshën e fanellës me numrin 9 në San Siro. Profili i tij është më shumë i një sulmuesi dytësor, dikush që luan mirë pranë një qëndre klasike, jo ai që udhëheq sulmin vetëm.
Pellegrino i Parmës është një tjetër emër intrigues, por përsëri – më shumë kandidat për stol se sa titullar i garantuar. Milani ka nevojë për një lider, jo për një projekt të ardhshëm.
Në skajin tjetër të spektr-it qëndrojnë dy emra që do të ishin zgjidhje perfekte, por që mbeten në botën e ëndrrave: Lewandowski, i cili do të sillte klas dhe efikasitet edhe për një sezon ose dy, por transferimi i tij në Serie A duket komplikuar; dhe Vlahovic, sulmuesi i Juventusit që mediat italiane e vendosin pranë rinovimit me bardhezinjtë.
Këtu qëndron paradoksi më i madh. Vlahovic është profili që i përshtatet më shumë Milanit – një bomber i klasit botëror, në kulmin e karrierës, me aftësi të dëshmuara në Serinë A. Komisionet e larta dhe rroga e majme janë pengesa, por klubi që pretendon titullin nuk mund të lejojë detaje financiare të bllokojnë një transferim kaq strategjik. Më tepër akoma, sjellja e tij në Milano do të ishte një goditje dyfishtë: zgjidhje e problemit të Milanit dhe krijim i një krize te rivali i përjetshëm.
Ndërsa merkato vazhdon të jetë një labirint pa dalje të qartë, një tjetër temë dominon diskutimet në ambientet kuqezi: e ardhmja e Rafael Leaos. Ylli portugez, i detyruar të luajë në një rol jo natyral dhe me probleme fizike që e kanë kufizuar gjatë gjithë sezonit, ka dhënë kontribute të rëndësishme, por ndjesia është se diçka ka ndryshuar.
Cikli i Leaos në Milan mund të jetë arritur në fundin e tij natyror. Ai ka dhënë gjithçka që kishte për të dhënë – magjinë, golat vendimtarë, momentet e brilancës që i kanë dhuruar tifozëve kujtime të paharrueshme. Por futbolli është i pamëshirshëm: kur një marrëdhënie arrhet kulmin, vazhdimi bëhet i vështirë për të dyja palët.
Nëse Massimiliano Allegri vazhdon edhe sezonin e ardhshëm me formacionin 3-5-2, largimi i Leaos bëhet edhe më i logjikshëm. Portugezi ka nevojë për një sistem që e vlerëson atë si një anësor klasik, jo si një “false nine” apo organizator të dytë. Një ndarje tani do të ishte më pak e dhimbshme se sa një zvarritje që do të dëmtonte të dyja palët.
Verë 2024 do të jetë momenti i vërtetimit për Milanin. Suksesi nuk matet më me blerje mediokre dhe kompromise të kushtueshme. Klubi ka nevojë për një bomber që të rikthejë frikën te kundërshtarët dhe një vendim të qartë për të ardhmen e Leaos. Ose kthehet në elitën europiane, ose rrezikon të mbetet peng i mesatares. Zgjedhja është në duart e drejtuesve – dhe historia nuk i fal ata që hezitojnë.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
