Zërat nga Anglia vijnë si stuhi vere mbi qiellin kuqezi. E ardhmja e Christian Pulisic mund të marrë sërish ngjyrat e Premier League, në një skenar që trazoi ambientin milanist. Sipas raportimeve të portalit britanik CaughtOffside, drejtuesit e Milanit kanë vendosur një prag të qartë për t’u ulur në tryezë: vetëm një ofertë “monstre” mund të hapë diskutimin.
Nga klubi i rrugës Aldo Rossi mesazhi është i prerë: askush nuk është i pashitshëm, por askush nuk largohet pa çmimin e duhur. Dhe për numrin 11 kuqezi, fatura shkon nga 70 deri në 90 milionë euro. Shifër kjo që do të garantonte një fitim marramendës, duke pasur parasysh se për të, më 2023 te Chelsea F.C, u paguan rreth 20 milionë.
TRE GJIGANDËT E PREMIER NË PRITJE
Interesimi nuk është i rastësishëm. Tre kolosë anglezë kanë hedhur sytë mbi “Captain America”: Arsenal FC, Manchester United FC dhe Tottenham Hotspur FC. Të tre klubet e shohin Pulisic si profil ideal: i pjekur taktikisht, fleksibël në të dy krahët dhe me ndikim global në aspektin komercial.
Rikthimi në Londër apo transferimi në Manchester do të ishte një kapitull i ri për amerikanin, i cili në Serie A ka rilindur dhe ka gjetur vazhdimësinë që kërkonte. Por Milani nuk ka ndërmend të bëjë zbritje. Strategjia është e qartë: ose vjen oferta e parezistueshme, ose projekti vazhdon me të në qendër.
Në sfond qëndron vizioni i drejtuesve, me Gerry Cardinale dhe Giorgio Furlani të gatshëm të vlerësojnë çdo skenar. Në rast të një “çeku të çmendur”, fondi mund të riinvestohet në profile më të rinj ose për të përforcuar reparte të tjera – me ëndrra të mëdha në merkato.
GODITJE TAKTIKE PËR ALLEGRIN?
Për Massimiliano Allegri, humbja e Pulisic do të ishte një goditje e rëndë. Amerikani është ekuilibratori perfekt i sistemit: garanton gola, asistime dhe disiplinë taktike. Ai është lojtari që lidh repartet, që sakrifikon në fazën mbrojtëse dhe që ndez tranzicionet me shpejtësi.
Në një sezon ku objektivat janë të mëdha, privimi nga një element kaq i rëndësishëm do të kërkonte një rikonceptim të skemës. Allegri e di se ekuilibri është themeli i skuadrës së tij, dhe Pulisic është një nga shtyllat kryesore.
Megjithatë, merkatoja e verës premton të jetë e nxehtë. Premier League ka fuqinë financiare për të tunduar çdo klub italian. Milani, nga ana e tij, duhet të zgjedhë mes ambicies sportive dhe racionalitetit ekonomik.
Në Milano askush nuk nxiton të mbyllë dyer, por as të hapë porta pa çelësin e artë. Pulisic nuk është i paprekshëm, por është i çmuar. Nëse nga Anglia vjen oferta që trondit bilancet, historia mund të marrë kthesë. Deri atëherë, “Captain America” mbetet arma sekrete e Djallit – dhe simboli i një Milani që kërkon të rritet pa u shitur lirë.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
