Ka rikthime që nuk bëjnë zhurmë. Nuk shoqërohen me tituj bombastikë, nuk shpërthejnë menjëherë në faqe të para, por rriten ngadalë, si një ide që kërkon kohën e vet për t’u kuptuar. Rikthimi i Ardon Jasharit në orbitën e Milanit është pikërisht një prej tyre. Pas një dëmtimi të rëndë – fraktura në perone – që e mbajti larg fushave për muaj të tërë, mesfushori zviceran ka rihyrë në skemat e Allegrit me hapa të vegjël, por gjithnjë e më të sigurt.
Vetëm dy herë titullar deri tani, e fundit kundër Lecces. Por ajo ndeshje, në pamje të parë “normale”, mund të mbahet mend si pika e kthesës. Sepse aty, në një mbrëmje pa shumë drita, Jashari tregoi pse Milani kishte vendosur ta konsideronte si një shtyllë të së ardhmes.
Rikthimi pas errësirës: Lecce si ndeshja e rilindjes
Fraktura e perones nuk është thjesht një dëmtim fizik. Është një provë mendore, një sfidë me durimin, një luftë me kohën. Jashari e ka kaluar në heshtje, duke punuar larg reflektorëve, për t’u rikthyer jo vetëm i shëndetshëm, por edhe i pjekur.
Ndaj Lecces, zvicerani nuk bëri asgjë spektakolare – dhe pikërisht këtu qëndron vlera e tij. Me topin në këmbë zgjodhi gjithmonë zgjidhjen më të thjeshtë. Pa teprime, pa rreziqe të panevojshme. Por puna e tij e vazhdueshme në fazën mbrojtëse, ripiegimi, mbulimi i hapësirave dhe ruajtja e ekuilibrave ishin thelbësore për stabilitetin e mesfushës kuqezi.
Ai nuk ishte ende në 100%, kjo u pa qartë. Por sinjalet ishin të forta. Dhe në futboll, sinjalet shpesh vlejnë më shumë se statistikat.
Fjalët e Allegrit dhe një investim që kërkon rol protagonist
Konfirmimi më i fortë erdhi nga njeriu që i sheh lojtarët çdo ditë nga afër: Massimiliano Allegri. Pas ndeshjes me Leccen, trajneri u shpreh pa hezitim:
“Jashari bëri një ndeshje shumë të mirë, si në aspektin e qarkullimit të topit, ashtu edhe në intensitetin e vrapimit.”
Nuk janë fjalë rastësore. Sepse ideja e Milanit, që në verë, ishte e qartë: Jashari nuk u mor për të qenë një alternativë luksi, por për t’u shndërruar në një kolonë të mesfushës së së ardhmes. Një investim i rëndësishëm ekonomik dhe teknik, që nuk mund të përfundojë në rolin e “rezervës së përhershme”.
Mes Rabiot dhe Modric: konkurrencë, por edhe mundësi
Mesfusha e Milanit është një terren i mbushur me emra të rëndë. Rabiot garanton fizik dhe përvojë, Modric klas dhe inteligjencë të jashtëzakonshme futbolli. Në këtë mozaik, ku mund të gjejë vend Jashari?
Përgjigjen e jep vetë lojtari:
“Mund të luaj si numër 6, por edhe si numër 8.”
Me një preferencë të qartë për rolin e mezzalës, aty ku mund të kombinojë vrapimin, disiplinën taktike dhe cilësinë në pasim.
Është e pamendueshme që një lojtar me potencialin dhe investimin e bërë mbi të të përdoret thjesht si një “zëvendës i Modric” për t’i dhënë pushim kroatit. Edhe Allegri e ka kuptuar këtë. Prandaj ka folur hapur për një bashkëjetesë taktike mes kampionit ish-Real Madrid dhe talentit zviceran.
E ardhmja ka nisur tashmë
Jashari nuk është më thjesht një rikthim nga dëmtimi. Ai është një projekt që po merr formë. Një lojtar që rritet ndeshje pas ndeshjeje, që nuk kërkon skenën, por e fiton atë me punë. Në muajt e ardhshëm, me rritjen e minutazhit dhe formës fizike, ai mund të shndërrohet në një element kyç për ekuilibrat e Milanit.
“Piano, piano… ma con sostanza.”
Ngadalë, por me përmbajtje. Dhe për Milanin, ky është ndoshta lajmi më i mirë.
BËHU PJESË E KLUBIT ONLINE TË TIFOZËVE ROSSONERË, MILANISTAT.com, PËR TË MARRË ÇDO DITË, NË ÇDO MOMENT, TË REJAT MË TË FUNDIT QË REDAKSIA JONË, ME BASHKËPUNËTORË NË MILANO, ROMË, BERLIN, LONDËR DHE NJU JORK J’UA OFRON ME CILËSINË MË TË MIRË. MJAFTON TË KLIKOSH NË LINKUN KËTU>>>>>>, ose TË KLIKOSH NË LINKUN TJETËR KËTU>>>>>>
