U njoftua më 30 dhjetor, Sergio Conceiçao në tetë ditë ka fituar tashmë trofeun e tij të parë si trajner i Milanit. I kanë mjaftuar vetëm dy ndeshje, të dyja të përmbysura kur dukej e përfunduar. Fillimisht Juventus, pastaj Inter. Nuk ka dyshim se, edhe pse portugezi nuk ka sjellë ndryshime të mëdha në profilin e lojës, ai ia ka arritur të shkundë grupin dhe të prekë kordet e duhura në të dyja ndeshjet. Ai është trajneri i Milanit që ka drejtuar më pak ndeshje (dy) për të fituar një trofe në historinë e klubit kuqezi në të gjitha kompeticionet që prej 1929/30; deri më tani rekordi i përkiste Vincenzo Montellës (në ndeshjen e 18-të ai fitoi Superkupën e Italisë në dhjetor 2016).
Superkupa e Italisë është titulli i tij i 12° si trajner, pas njëmbëdhjetë të fituar me Porton (3 kampionate portugeze, 4 kupa portugeze, 1 kupë të ligës portugeze, 3 superkupa portugeze). Si futbollist, Conceiçao ka fituar 5 tituj me një skuadër italiane, në këtë rast Lazio: për ironi, trofeu i parë ka qenë Superkupa e Italisë me golin e tij vendimtar, në minutën e 94-të: revanshi 1-2 në fushën e Juventusit. Kjo u pasua nga Kupa e Kupave dhe Superkupa UEFA më 1999 dhe nga Scudetto-Coppa Italia më 2000.
